Prezıdent Qasym-Jomart Toqaev Qatar Memleketiniń Ámirimen, BAÁ Prezıdenti sheıh Muhammed ben Zaıd Ál Nahaıanmen telefon arqyly sóılesti, dep habarlaıdy Egemen.kz.
Memleket basshysy Qasym-Jomart Toqaev sheıh Támım ben Hamad Ál Tánımen áńgimelesý barysynda Taıaý Shyǵystaǵy ahýaldy talqylady.
Prezıdent aımaqta qaqtyǵystyń órship ketkenine alańdaýshylyq bildirip, osynaý kúrdeli kezeńde Ámir men baýyrlas Qatar halqyna tilektes ekenin aıtty.
Sheıh Támım ben Hamad Ál Tánı Qazaqstannyń udaıy qoldaýy úshin rızashylyǵyn jetkizip, eki el arasyndaǵy san qyrly qarym-qatynasty dostyq jáne strategııalyq seriktestik rýhynda odan ári nyǵaıtýǵa nıetti ekenin rastady.
Qazaqstan Prezıdenti qasıetti Ramazan aıynda Qatar Ámiriniń memlekettik qyzmetine tabys, al baýyrlas Qatar halqyna beıbitshilik pen baq-bereke tiledi.
Sonymen qatar, Memleket basshysy Qasym-Jomart Toqaev BAÁ Prezıdenti sheıh Muhammed ben Zaıd Ál Nahaıanmen telefon arqyly sóılesti.
Qazaqstan Prezıdenti Taıaý Shyǵystaǵy ahýaldyń ýshyǵýyna alańdaýshylyq bildirip, Ámirlikterdiń basshylyǵy men barsha halqyna shynaıy qurmetin, qoldaýy men tilektestigin jetkizdi. Qasym-Jomart Toqaev qarýly qaqtyǵys barysynda Birikken Arab Ámirlikteriniń azamattyq ınfraqurylymyna zaqym kelgenine qynjylatynyn aıtty.
«Qazaqstan Birikken Arab Ámirlikterin dostas ári baýyrlas el retinde qarastyrady, qajet jaǵdaıda qal-qaderinshe kómektesýge daıyn», dedi Qazaqstan Prezıdenti.Memleket basshysy BAÁ azamattyq nysandaryna, sondaı-aq Shyǵanaqtaǵy basqa da elderge jasalǵan shabýyl qatań aıyptalýy kerek dep sanaıdy. Sheıh Muhammed ben Zaıd Ál Nahaıan elimizdiń qoldaýyn joǵary baǵalap, qazirgi halyqaralyq daǵdarysty eńserýde kómek kórsetýge yqylas tanytqany úshin rızashylyǵyn bildirdi. Áńgimelesý barysynda taraptar Qazaqstan men BAÁ arasyndaǵy dostyq qarym-qatynas pen strategııalyq seriktestikti nyǵaıtýǵa beıil ekenin rastady. Sondaı-aq qasıetti Ramazan aıynda eki eldiń halqyna beıbitshilik pen baq-bereke tiledi.