Senat depýtaty Olga Býlavkına TMD-ǵa múshe memleketterdiń Parlamentaralyq Assambleıasynyń Agrarlyq saıasat, tabıǵı resýrstar jáne ekologııa jónindegi turaqty komıssııasynyń kóshpeli otyrysyna qatysty.
Otyrys barysynda qatysýshylar agrarlyq saıasat, ekologııa jáne tabıǵatty utymdy paıdalaný salasyndaǵy modeldik zańnamany jetildirý jáne parlamentaralyq ózara is-qımyldy damytý jónindegi aýqymdy máselelerdi qarady.
Kún tártibindegi negizgi máseleniń biri – TMD-ǵa múshe memleketterge arnalǵan jańa redaksııadaǵy úlgi Jer kodeksiniń jobasyn talqylaý. Qaraý qorytyndysynda qujat tutastaı maquldanyp, keıinnen TMD PAA plenarlyq otyrysynyń qaraýyna engiziletin boldy.
Sonymen qatar komıssııa músheleri Dostastyq keńistigindegi sany 140-tan asatyn ıadrolyq mura nysanyna baılanysty radıasııalyq-ekologııalyq qaýipterdi joıý salasyndaǵy TMD memleketteriniń is-qımyldaryn úılestirýge baǵyttalǵan tujyrymdamalyq qujatty ázirleý jónindegi bastamany qoldady.
Otyrys aıasynda TMD memleketterindegi agrarlyq saıasat jáne ekologııa salasyndaǵy zańnamany damytý máseleleri, qaldyqtardy qaıta óńdeýdi ekonomıkalyq yntalandyrý sharalary, sondaı-aq jer qoınaýyn paıdalaný salasyndaǵy sarapshylar qyzmetiniń etıkalyq máseleleri qaraldy.
«Taýly aýmaqtardyń turaqty damýy» halyqaralyq forýmynyń qorytyndysyna jáne transshekaralyq erekshe qorǵalatyn tabıǵı aýmaqtardy qalyptastyrý máselelerine erekshe kóńil bólindi.
Otyrys qorytyndysynda úlgi zań shyǵarýdy odan ári damytý jáne TMD-ǵa múshe memleketterdiń turaqty damý salasyndaǵy yntymaqtastyǵyn nyǵaıtýǵa baǵyttalǵan tıisti sheshimder men usynymdar qabyldandy.