Mal sharýashylyǵyn óristetýge qolaıly óńir

Kezdesýge keńeıtilgen formatta onlaın baılanys arqyly aýdandardaǵy sharýa qojalyqtarynyń basshylary da qatysty. Oblys ákimi Ashat Shaharov óńir aýyl sharýashylyǵynyń negizgi baǵyty mal sharýashylyǵy bolyp qala beretinin atap ótti. Bul rette Áıteke bı, Qarǵaly, Hromtaý, Mártók aýdandarynda egin sharýashylyǵy da qarqyndy damyp keledi.

Byltyr oblysta aýyl sharýashyly­ǵy óniminiń kólemi 412 mlrd teńgeni qurap, ótken jylmen salystyrǵanda 2,5%-ǵa ósti. 2026–2028 jyldary óńirdiń ag­roónerkásip kesheninde jalpy soma­sy 94,9 mlrd teńgeni quraıtyn 11 ınvestısııalyq jobany júzege asyrý josparlanyp otyr. Onyń ishin­de 4 joba bıyl iske qosylady. Olardyń qatarynda «Jannur» ShQ men «Agroproduct development» JShS bor­daqylaý alańdaryn salý men keńeıtý, «Ramazan qus» JShS qus fabrıkasyn iske qosý, sondaı-aq «AIS» JShS sút-taýar fermasyn ashý bar.

Byltyr óńirde 554 myń tonna dándi daqyl men 72,4 myń tonna maıly daqyl jınaldy. Sondaı-aq kókónisten, sonyń ishinde kartoptan mol ónim alyndy. Egis alqaptaryn ártaraptandyrý aıasynda maıly jáne mal azyqtyq daqyldardyń kólemi ulǵaıtyldy.

Kezdesý barysynda Aýyl sharýa­shylyǵy vıse-mınıstri Amanǵalı Berdalın qatysýshylardy mal sharýa­shylyǵyn damytý jónindegi jańa Keshendi jospardyń negizgi para­metrleri týraly habardar etti.

Talqylaý kezinde sharýalar bir­qatar másele kóterdi. Atap aıt­qan­da, Qazaqstan fermerleri qaýymdas­tyǵy oblystyq fılıalynyń jetekshisi Qusaıyn Sársembaı «Igilik», «Bereke», «Jaılaý» baǵdarlamalary boıynsha «Damý» kásipkerlikti damytý qory arqyly kepildik berý múmkindigin qarastyrýdy usyndy.

Serik Jumanǵarın qazir osy baǵdarlamalar boıynsha «Damý» qory arqyly kepildikter berý tetigi pysyqtalyp jatqanyn aıtty. Bul quraldy engizý jónindegi aldyn ala kelisimge qol jetkizilgen. Alaıda jekelegen sharttar men tehnıkalyq parametrler áli de kelisý satysynda tur.

Sonymen qatar nesıe men lızıngke qatysty paıyzdyq mólsherlemelerdi sýbsıdııalaýdyń qoljetimdiligi máse­lesi kóterildi. «Aıs plıýs» JShS dırektory Qýanysh Ishanov bıýdjet qara­jatynyń joqtyǵyna baılanysty portal jumysy toqtatylǵanyn, sondyqtan ótinim berý múmkin emestigin málimdedi.

Sondaı-aq óńirdegi «Stepnoe» JShS, «Qumqudyq» JShS, «Prıgorodnoe» JShS, «Meńdibaı-Qaraǵash» ShQ ókilderi de óz suraqtaryn qoıdy. Bar­lyq kóterilgen máselege qatysty jıyn barysynda túsindirme berildi.

Kezdesý qorytyndysynda vıse-premer Aqtóbe oblysy – 25,3 mln gek­tar jaıylymdyq jeri bar eli­miz­degi eń iri óńir ekenin atap ótti. Memleket sharýalarǵa qoldaý kór­setýdi jalǵastyrady, sonymen qatar qarsy talaptar da kúsheıtiledi. Onyń negizgisi – aýyl sharýashylyǵy jerlerin tıimdi paıdalaný. Osy baǵyt­ta jerdi paıdalanýdyń tıimdilik kór­setkishterin engizý, sondaı-aq egin sharýashylyǵymen aınalysa­tyn sharýashylyqtardyń mal sharýa­shylyǵyn da qatar alyp júrý múmkindigi qaralyp jatyr.

Sonymen qatar Serik Jumanǵarın bıýdjet máseleleri týraly bólek jıyn ótkizip, onda qarjylandyrýdyń negizgi parametrleri men shyǵystardyń basym baǵyttary qarastyryldy. Talqylaý qorytyndysynda bıýdjet qarajatyn tıimdi paıdalaný men onyń ıgerilýine baqylaýdy kúsheıtý jóninde tapsyrmalar berildi.

Jumys sapary aıasynda vıse-premer «KAZFELTEC» JShS-nyń jún óńdeý zaýytynyń jumysymen de tanysty. Kásiporyn ıtalııalyq tehnologııalardy paıdalanyp, tabıǵı qoı júninen jylý jáne dybys oqshaýlaǵysh materıaldar óndirýge mamandanǵan.