Keıingi jyldary memleket tarapynan jas ǵalymdarǵa qoldaý sharalary qarqyndy qolǵa alyndy. Buǵan jas zertteýshilerdiń jobalaryna arnalǵan bólek grant pen jyl saıyn «Jas ǵalym» jobasy aıasynda sheteldik ǵylymı uıymdarda taǵylymdamadan ótýge berilgen múmkindik dálel bola alady. Sonyń nátıjesinde Qazaqstanda keıingi 2 jylda jas ǵalymdardyń sany kóbeıgen.
Bilim jáne ǵylym mınıstrliginiń deregine súıensek, 2018 jyly ǵalymdar sany 8 myńnan asypty. Al 2021 jyldyń qorytyndysy boıynsha ǵylym salasynda 9 200 jas qyzmetker eńbek etedi.
Atalǵan vedomstvoǵa qarasty Ǵylym komıtetiniń tóraǵasy Janna Qurmanǵalıeva: «Jastardyń ǵylym salasyna kelýi olardy qyzyqtyratyn tıimdi jaǵdaıdyń jasalyp jatqanyn bildiredi. Jas zertteýshilerdi qoldaý maqsatyndaǵy memleket qabyldaǵan sharalardyń nátıjesinde ǵalymdar sany artty. Ǵylym salasyn bıýdjetten qarjylandyrý sońǵy 2 jylda 2 esege jýyq ósti. Ǵylymı jobalardy granttyq qarjylandyrý merzimi 5 jylǵa deıin uzartyldy. Eger buryn granttar konkýrsy 3-5 jylda bir ret ótkizilgen bolsa, qazir olar jyl saıyn ótkiziledi. Esep berý azaıdy, bıýrokratııalyq kedergiler joıyldy. Jas ǵalymdar úshin jeke granttar qarastyrylǵan. Magıstranttar men doktoranttardyń stıpendııalary aıtarlyqtaı artty. Jas zertteýshilerge arnaıy syılyqtar taǵaıyndaldy. Memleket basshysynyń tapsyrmasy boıynsha qazaqstandyq ǵalymdarǵa álemniń jetekshi ǵylymı ortalyqtarynda taǵylymdamadan ótý múmkindigi berildi. Osylaısha, jas ǵalymdardyń ǵylymı ıdeıalary men áleýetin júzege asyrý úshin barlyq jaǵdaı jasalyp jatyr», deıdi.
Bıologııalyq qaýipsizdik problemalary ǵylymı-zertteý ınstıtýtynyń (BQPǴZI) ǵylymı qyzmetkeri Rýslan Ábitaev – otandyq «QazVac» vaksınasyn ázirleýge qatysqan jas ǵalymdardyń biri. Ol atalǵan ınstıtýttaǵy Baqylaý, bıologııalyq tehnologııalar zerthanasynda jumys isteıdi. Jas zertteýshi zerthanada vaksınalardyń qaýipsizdigi men ımmýnogendiligin tekseredi. 28 jastaǵy Rýslan jas ǵalymdarǵa memleket tarapynan kórsetiletin qoldaýdy sezinetinin jetkizdi.
«Anam – muǵalim, mektepte bıologııadan sabaq beredi. Ol árdaıym ǵylym týraly qyzyǵýshylyqpen aıtatyn, meni zerthanaǵa ertip aparyp, mıkroskoptardy kórsetti. Bul baǵyt meni qatty qyzyqtyrdy. 9-synypta BQPǴZI týraly estidim. Sol kezde ǵylymmen aınalysyp, dál sol ınstıtýtta jumys isteımin dep sheshtim. QazUÝ-da oqyp júrgen kezimde jyl saıyn ınstıtýtta zertteý tájirıbesinen óttim, al JOO-ny bitirgennen keıin meni osynda jumysqa qabyldady. Men jas ǵalym retinde memleket tarapynan kórsetilgen qoldaýdy sezinemin. Bes jyl buryn qyzmet jolyn BQPǴZI-da zerthanashy retinde bastaǵan edim, qazir ǵylymı qyzmetkermin. Osy ýaqyt ishinde jalaqym aıtarlyqtaı ósti», deıdi R.Ábitaev.
Jaqynda BQPǴZI janynan halyqaralyq standarttarǵa sáıkes zamanaýı quraldarmen jabdyqtalǵan bıofarmasevtıkalyq zaýyt salyndy. Sonymen qatar ınstıtýttyń qyzmetkerlerine arnap kópqabatty úı de paıdalanýǵa berilgen. Jas ǵalym R.Ábiltaev ta BQPǴZI qyzmetkeri retinde sý jańa úsh bólmeli páterdiń kiltin ıelendi. Ol elimizde ǵylymı qyzmetpen aınalysatyn jastarǵa jaqsy jaǵdaılar jasalyp jatqanyna, sonyń nátıjesinde qazir qatarynyń aıtarlyqtaı kóbeıip keletinine qýanyshty.