Qańtar aıynda uıymdastyrylǵan Ulttyq biryńǵaı testileýge qatysqan bilim alýshylardyń 34 paıyzy 50 ball ala almaǵan, dep habarlaıdy Egemen.kz.
QR Ulttyq testileý ortalyǵynyń dırektory Rýslan Emelbaev máseleniń mánisin ashyp aıtty.
«Jalpy 103 886 ótinim qabyldandy. 95 paıyzy osy jylǵy 11 jáne 12 synyp oqýshylary, al 4 765-i joǵary oqý ornyna akademııalyq kezeńge shartty túrde qabyldanǵan 1-kýrs stýdentteri, 413-i pedagogıkalyq ǵylymdar salasyna aýysatyn stýdentter jáne 327-si shyǵarmashylyqtan basqa bilim berý toptaryna aýysatyn stýdentter», dedi ol.
Onyń sózine zer salsaq, búginge deıin 29 myń talapker test tapsyrǵan. 78 paıyzy qazaq tilin, 21 paıyzy orys tilin tańdaǵan. Sonymen qatar 43 bala UBT-ny aǵylshyn tilinde tapsyrýǵa nıettenip, 38-i testileýge qatysqan.
«50 ball jınaı almaǵan talapkerlerdiń sany 10 myń adamdy quraıdy. Iаǵnı 34 paıyzy belgilengen shekti mejege jete almady», deıdi Rýslan Emelbaev.