Álem ádebıetindegi moıny ozyq aıtýly qalamgerlermen esimi birge atalatyn Ábekeń, Ábdijámil Nurpeıisov aǵamyz shyn máninde kóziniń tiri kezinde-aq aty ańyzǵa aınalǵan ǵajap adam edi.
Biz baıqaǵan tusta ol kisi qandaı jaǵdaıda bolmasyn, bastaǵan isin aıaǵyna jetkizbeı orta jolda qaldyrmaıtyn, asyǵystyq – ata jaýy, qaǵazǵa túsken árbir sóz, árbir sóıleminiń sapasy men salmaǵyn ábden ıini qanǵansha myń qaıtara elep-ekshep, sosyn baryp jarııalaýǵa usynatyn. Baspadan shyǵaıyn dep jatqan kitabyn bir qarap bereıin dep qaıtaryp alyp, sodan birneshe jyl boıy qashan kóńilinen shyqqansha qyrnap-súrnegeni ertegi sekildi el-jurttyń áli esinde.
«Qan men ter» trılogııasyn, ıaǵnı dúnıejúzi ádebıetiniń bir injý-marjanyna aınalǵan úsh kitapty bir jınaqtyń aıasyna syıǵyzyp, aıaýsyz qysqartyp, óziniń júzge jaqyndaǵan jasyna qaramaı aq ter-kók ter bop, elordada aýrýhanada jatyp arpalysqan sátine azdap kýá bolǵanymyz bar edi. Til ushyn túrtip turǵan baıaǵy jattandy tirkes: «Eldiń áldeqashan rýhanı qazynasyna aınalyp ketken dúnıeni óńdeı berip qaıtesiz?!» Qaıtarylǵan jaýap ta mirdiń oǵyndaı: «Sender ne bilesińder, men artyma qaramaı ólýim kerek qoı...»
Iá, artyna qaramaı, alańdamaı tasqa basylǵan kitaptarynyń bir jerinen tıtimdeı kinárat-kúmán qaldyrmaı, boıyndaǵy kúsh-qýaty men oıyndaǵysynyń bárin qaǵazǵa túsirip, ádebıetke degen sońǵy paryzyn adal atqaryp, ómirden ótken qadirli qalamgerlerimizdiń biri hám biregeıi de sirá, Ábekeń bolar-aý! «Sońǵy paryzdy» da san márte jóndedi, san tilge san márte aýdartyp, aqyry túz granıtindeı muqalmaıtyn sapaly dúnıe etip shyǵardy. Qos roman ana jyly aǵylshyn tilinde Amerıkada jaryq kórdi. Kózi tirisinde mundaı qurmetke ıe bolǵandar sırek, sol «sırektiń» bas jaǵynda taǵy da Ábekeńniń turýy – tabıǵı zańdylyq. Kesheli-búgin anaý «Alyptar toby» bastaǵan dańǵyl joldy jalǵastyrýǵa taısalmaı kirisken Ábekeńsiz týǵan ádebıetimiz bir túrli jetimsirep qalǵandaı seziledi.
Qazaq qara sóziniń ary men abyroıy jáne sesi, bir teńizdiń aýasyn jutyp, ashy sýyn bólip ishken asyl aǵa, jatqan jerińiz jaıly, topyraǵyńyz torqa bolsyn.
Qýanysh JIENBAI