Reseıdiń Sankt-Peterbýrg qalasynda WTA 500 týrnıriniń shymyldyǵy túrildi. Júlde qory 703 580 AQSh dollaryn quraǵan jarysta Elena Rybakına da sheberlik baıqasýda.
Elimizdiń birinshi raketkasy tusaýkeser kezdesýin Varvara Grachevaǵa qarsy ótkizdi. 21 jastaǵy Máskeýdiń týmasy byltyr Rolan Garros pen Aýstralııanyń ashyq birinshiliginde úshinshi kezeńge deıin jetken. Álemdik reıtıngte ol bul kúnderi 81-oryndy enshileýde. Bul básekede Rybakınanyń ústemdigi anyq baıqaldy. Nebári 57 mınýtqa sozylǵan saıys 6:2, 6:1 esebimen jerlesimizdiń paıdasyna sheshildi. Keshe Elena Tereza Martınsovpen kúsh synasty. WTA tiziminde 42-orynda turǵan 27 jastaǵy Chehııa oıynshysynyń eń úzdik kórsetkishi – 2021 jyly Ýımbldonnyń úshinshi aınalymynda óner kórsetýi. Alǵashqy kezeńde ol reseılik Vera Zvonarevadan aılasyn asyrǵan-tyn.
Al Nıderlandtyń Rotterdam qalasynda ótip jatqan ATR týrnıriniń alǵashqy aınalymynda Aleksandr Býblık ulybrıtanııalyq tanymal tennısshi Endı Marreıden 6:7, 4:6 esebimen jeńilip qaldy.