Jaqynda Semeı qalasynda sporttyq jáne jaýyngerlik sambodan Azııa jáne álem chempıony Qýanysh Salyqbaıdy eske alýǵa arnalǵan doda ótti. Jaqsylyq Úshkempirov atyndaǵy Dene shynyqtyrý-saýyqtyrý kesheninde Shyǵys Qazaqstan oblysynyń túkpir-túkpirinen kelgen 100-den astam balýan 16 salmaq (erler 8 jáne jaýyngerlik sambodan 8) boıynsha júldelerdi sarapqa saldy.
Eń áýeli Qýanysh Salyqbaı degen kim? Osyǵan azyraq toqtalsaq. Q.Salyqbaı (08.07.1971–16.04.2019) Shyǵys Qazaqstan oblysy, Úrjar aýdany, Qyzylbulaq aýylynda dúnıege kelgen. Semeı maldárigerlik ınstıtýtynda oqı júrip, Qazaqstannyń eńbek sińirgen jattyqtyrýshylary S.Toqtarǵazın men S.Qorjykenovtiń kómegimen kúres óneriniń ádis-tásilderine ábden qanyqqan. Áýeli Maqanshy (qazirgi Úrjar) aýdanynyń, sosyn Semeı (keıinnen Shyǵys Qazaqstan) oblysynyń jáne Qazaqstan qurama komandasynyń namysyn qorǵaǵan. Ol – 48 jyldyq ǵumyrynyń 35 jylyn kilem ústinde ótkizgen, kúres tarıhynda eń uzaq beldesken balýannyń biri. Ol sambo, qazaq jáne belbeý kúresterinen halyqaralyq dárejedegi sport sheberi, sambodan Qazaqstannyń bes dúrkin chempıony jáne tórt dúrkin el kýbogynyń ıegeri, Azııa chempıony jáne álem chempıony (35-39 jastaǵylar arasynda), belbeý kúresinen álem chempıonatynyń kúmis júldegeri, Qazaqstannyń bes dúrkin, Azııanyń úsh márte absolıýttik chempıony.
– Aldaǵy ýaqytta Semeıde Qýanysh Salyqbaevtyń atynda qazaq kúresinen týrnır ótkizsek, ony turaqty ótetin bedeldi respýblıkalyq týrnırge aınaldyrsaq, – degen Qazaqstannyń eńbek sińirgen jattyqtyrýshysy Serik Toqtarǵazın Q.Salyqbaıdyń 35 jasqa deıin úzbeı kúresip, tolaǵaı tabysqa jetkenin aıtty. – «Balýandardyń kóbi otyzdan asa bere kúresti toqtatady. Al Qýanysh – otyz bes jasqa deıin úzbeı kúresip kgp, ardagerler arasynda sambodan qyryq shaqty respýblıkalyq jáne halyqaralyq týrnırlerdiń absolıýttik chempıony, Qazaqstannyń bes dúrkin, Azııanyń úsh márte absolıýttik chempıony bolyp, Shyǵys Qazaqstan oblysynyń namysyn abyroımen qorǵaǵan balýan edi», dedi ol.
– Qýanysh aǵamyz – sambo jáne qazaq kúresterinen ózindik órnegi, aıla-tásili, jeńiske degen qulshynysy bar balýan edi. Sondyqtan onyń esimi qazaq kúresinde árdaıym qalady dep senemin, – deıdi Qazaq kúresi federasııasynyń Shyǵys Qazaqstan óńiri boıynsha prezıdenti, Qazaq kúresinen álem jáne Azııa chempıony, «Qazaqstan Barysy» týrnıriniń kúmis jáne qola júldegeri Shalqar Jolamanov. – Biz, Semeı balýandary men bapkerleri Qýanyshtyń atyn qazaq kúresinde árdaıym este qaldyryp, jas urpaq onyń kúres jolynan úlgi-ónege alý úshin Semeıde Qýanyshtyń atynda qazaq kúresinen turaqty túrde ótetin bedeldi respýblıkalyq týrnır ótkizsek dep ózara aqyldasyp sheshtik. Endi josparymyzdy basshylarymyz qoldasa degen nıet bar.
Jeńimpazdar men júldegerler
Sporttyq sambo:
1-oryn: 53 kg: Suńǵat Nurlatuly, (2.Almat Kárim, 3.Baqdáýlet Nurmuhanbet), 58 kg: 1.Nurym Qaırollın (2.Dáýlet Amanuly, 3.Jaqsylyq Ospanov), 64 kg: 1. Esentaı Imahanov (2.Tólegen Nurǵalıev, 3.Dıdar Tuqyshov), 71 kg: 1.Janasyl Ánýarov (2.Jasyn Qalıaqparov, 3.Aıan Qurmanbek), 79 kg: 1.Rollan Saıatov (2.Shalqybek Rahmetolla, 3.Nurjan Bekeshov), 88 kg: 1. Rýslan Jarqynbaev (2. Qýanysh Rátaev, 3. Eldar Beısembaev), 98 kg: 1. Qýandyq Stampolov (2.Aıan Ramazanov, 3.Jolaman Manarbekuly), +98 kg: 1.Talǵat Ámirenov (2. Ádil Túkeshev, 3. Beksultan Ǵızat).
Jaýyngerlik sambo:
1-oryn: 53 kg: 1. Jastilik Ahmetbekov (2. Erkebulan Myrzahanov, 3. Erzat Maratbekov), 58 kg: 1. Muhtar Meırambek (2. Semen Karataev, 3.Roman Boıko), 64 kg: 1. Maratbek Rahmetollın (2.Manarbek Ásembaı, 3.Qanat Tileýbergenov), 71 kg: 1. Dáýren Dákenov (2.Azamat Baıgojın, 3.Erasyl Zııadanov), 79 kg: 1.Nurbolat Qulbekov (2. Elaman Tólesh, 3. Toqtasyn Dáýit), 88 kg: 1.Maǵjan Jumashev (2. Jaıdar Hasenov, 3. Eldos Myrzahmetov), 98 kg: 1.Erkebulan Omarov (2. Nursultan Jumaǵalıev), +98 kg: 1. Álibı Ýálı (2.Damır Seken).