О́tken aptanyń sońynda Beıjińdegi Qysqy Olımpııa oıyndarynan bólek, taǵy birqatar mańyzdy jarys ótti. Álemniń ár qıyrynda jalaýy jelbiregen dúbirli dodalarda Qazaq eliniń órenderi de tabysty óner kórsetip, biraz oljaǵa keneldi.
Fransııanyń Mes qalasynda ústel tennısinen WTT Youth Contender týrnıri óz máresine jetti. 15 jastaǵylar arasyndaǵy jarysta Alan Qurmanǵalıev aldyna jan salmady. Qazaqtyń jas óreni ýkraınalyq Anton Derlıýk, rýmynııalyq Rares Kýesdın, domınıkandyq Rafael Kabrera, koreıalyq Lı Chonmok, polshalyq Rafal Formel jáne jergilikti qos oıynshy – Natan Lam men Flavıen Kotondy qapy qaldyryp, bas júldeni qanjyǵasyna baılady. О́kinishke qaraı, 19 jastaǵylardyń báskesinde Sanjar Jubanov pen Tımofeı Gerasımenkonyń joly bolmady. Sanjar bastapqyda eki qarsylasyn utqanymen, 1/32 fınalda jeńilis tapty. Al Tımofeı toptyq kezeńde súrindi.
Máskeýde kórkem gımnastıkadan uıymdastyrylǵan Gran-prıdiń kezeńdik saıysynda Eljana Tánıeva urshyqpen jasalatyn jattyǵýda 32,30 upaı jınap, kúmis medaldy ıelendi. Qazaq qyzy tek jastar arasyndaǵy álemniń úsh dúrkin chempıony, komandalyq esepte Eýropa birinshiliginiń jeńimpazy, reseılik Lala Kramarenkodan ǵana qalyp qoıdy. Onyń kórsetkishi – 34,25 upaı. Reseıdiń taǵy bir juldyzy, dúnıejúzilik dodada 18 márte top jaryp, 10 ret qart qurlyqtyń teńdessizi dep tanylǵan Dına Averına bul joly qola medaldy qanaǵat tutty. Esesine basqa da jattyǵýlarda tabysqa jetken Dına kópsaıystyń qorytyndysy boıynsha bas júldeni oljalady. Ekinshi jáne úshinshi oryndardy da Reseı gımnasshylary Lala Kramarenko men Arına Averına enshiledi.
Albanııanyń astanasy – Tıranada taekvondodan ótip jatqan Prezıdent kýbogy jolyndaǵy jarysty jerlesterimiz sátti bastady. Alǵashqy kúni 87 kılo salmaq dárejesinde synǵa túsken Smaıyl Dúısebaı kúmis medaldy moınyna ildi.
AQSh-ta uıymdastyrylǵan ATR týrnırinde pákistandyq Aısam Hak Kúreshimen jup qurǵan qazaqstandyq Aleksandr Nedovesov aqtyq synǵa deıin alqynbaı jetti. Biraq sheshýshi tusta olar Marselo Arevalo (Salvador) men Jan-Jıýlen Roıerge (Nıderland) ese jiberip, ekinshi oryndy ıelendi.
Tennısten Qatardyń bas shahary – Dohada shymyldyǵy túrilgen WTA týrnıriniń alǵashqy aınalymynda Iýlııa Pýtınseva álemniń burynǵy birinshi raketkasy, bul kúnderi WTA reıtınginde 17-orynda turǵan Aýstralııanyń ashyq birinshiliginiń eki dúrkin jeńimpazy, US open týrnıriniń úsh ret fınalynda oınaǵan Belarýstyń betkeustary Vıktorııa Azerenkodan aılasyn asyra almady. Esep – 7:5, 2:6, 5:7. Elena Rybakına keshe fransııalyq Jaklın Krıstıanmen kúsh synasty.