Nemisterdiń Transfermarkt portaly shetelde óner kórsetip júrgen Qazaqstannyń eń qundy fýtbolshylarynyń reıtıngin jarııalady. Bul tizimde Reseı premer-lıgasyndaǵy Máskeýdiń SSKA klýbynyń namysyn qorǵap júrgen Bahtıer Zaınýtdınov kósh bastap tur.
23 jastaǵy Bahtıer Jambyl oblysynyń ortalyǵynda dúnıege keldi. Ár jyldary elimizdiń jasóspirimder men jastar quramasynda oınaǵan ol 2017 jyly «Tarazdyń» jeıdesin kıip, Qazaqstan chempıonatynyń alǵashqy maýsymynda premer-lıganyń eń úzdik jas oıynshysyna tıesili arnaıy syılyqty ıelendi. Sol jyly «Astanaǵa» aýysyp, Sýperkýboktyń ıegeri atandy. Kóp uzamaı jasyl alańda jasyndaı jarqyldaǵan Zaınýtdınovke Reseıdiń «Rostov» klýby bapkerleriniń kózi tústi. Bir maýsymdy Dondaǵy Rostovta ótkizgen jartylaı qorǵaýshy 2020 jyly SSKA-men kelsimshartqa otyrdy. Qazirgi kezde Bahtıer Zaınýtdınov – Qazaqstan ulttyq quramasy men Máskeýdiń áıgili áskerıler komandasynyń beldi oıynshysy. Jerlesimizdiń transferlik quny – 4 000 000 eýro.
Ekinshi orynda – Aleksandr Merkel. 29 jastaǵy Almatynyń týmasy kezinde ata-anasymen birge Jetisý óńirinen Germanııaǵa qonys aýdarǵan. Sportttyq mansabyn óziniń tarıhı otanynda bastaǵan ol keıinnen Italııa, Anglııa, Shveısarııa, Germanııa, Aýstrııa, Nıderland jáne Saýd Arabııasynyń chempıonattarynda baq synady. 2015 jyldan beri halyqaralyq dodalarda Qazaqstannyń namysyn qorǵaýda. Bul kúnderi Merkel Túrkııanyń «Gazıantepinde» oınaýda. Amplýasy – jartylaı qorǵaýshy. Aleksandr 2 000 000 eýroǵa baǵalanyp otyr.
Úzdik úshtikti Nuráli Álip túıindeýde. Ol Aqtaý qalasynda týyp-ósti. Birer jyl Almatynyń «Qaıratynda» oınaǵan 22 jastaǵy qorǵaýshyny bıyl Sankt-Peterbýrgtiń «Zenıt» klýby basshylary attaı qalap aldy. Neva jaǵalaýyna qonys aýdarǵan bette qazaqtyń uly sheberligimen kózge túsip, joldastyq kezdesýler barysynda qarsylastar qaqpasyna mańyzdy goldar soqty. Qazirgi kezde Nuráliniń transferlik quny 1 700 000 eýrony qurap otyr. Eger ol dál osy betinen taımasa, onda aldaǵy ýaqytta qandasymyzdyń baǵasy sharyqtaı túsetini anyq.
Sondaı-aq eń qundy «TOP-10» fýtbolshynyń qataryna myna oıynshylar enip otyr: Marat Bystrov («Ahmat», Reseı) – 900 myń, Iаn Vorogovskıı («Molenbek», Belgııa – 750 myń, Georgıı Jýkov («Vısla», Polsha) – 500 myń, Alekseı Shıotkın («Rotor», Reseı) – 400 myń, Akmal Baqtııarov («Olımp-Dolgoprýdnyı», Reseı) – 200 myń, Magamed Ýzdenov («Abdysh-Ata», Qyrǵyzstan) – 175 myń, Alekseı Rodıonov («Alashkert», Armenııa» – 150 myń, Argen Jumataev («Neftchı», Qyrǵyzstan) – 150 myń jáne Irısdavlat Hakımov («Alǵa», Qyrǵyzstan) – 150.