«О́mir bar jerde – ólim bar». О́limdi jerde jaǵa jyrtysqan daý bolmasa da, oqtyn-oqtyn kereǵar pikirler bolyp turady. Biri marqumdy o dúnıege shyǵaryp salý rásiminde dastarqandy toıdaǵydaı jaınatyp, tátti-dámdisin tosqysy kelse, endi biri marqumnyń basyna kúmbez turǵyzǵysy keledi. Munyń bári ysyrap. О́skemen aımaǵy aqsaqaldarynyń VI forýmynda osy salttyq rásimderdi bir arnaǵa túsirý jóninde sóz qozǵaldy.
Joǵary oqý ornynyń qabyrǵasynda ótken «Islam-yntymaq jáne birlik dini» jyly: maqsat, mindetter, aqsaqaldardyń orny men róli» atty forýmda ulttyq qundylyqtar tóńiregindegi máseleler jan-jaqty saralandy. Dástúrli jıynda din men dástúr sabaqtastyǵyn nyǵaıtý, jerleý, salttyq rásimderdi bir arnaǵa túsirýdi nasıhattaý jóninde sóz qozǵaldy. «Qazaq qoǵamynda jáne dástúrli tárbıede aqsaqaldardyń róli zor ekenin bilemiz. «Dástúrdiń ozyǵy bar, tozyǵy bar» deıdi qazaq. Bul jolǵy forýmnyń basty maqsaty – eldi yntymaqqa úndeý jáne ólim-jitimdegi rásimderindegi dástúrdi birizdilikke túsirý. Respýblıkalyq IV ımamdar forýmynda aıtylǵan osy baǵyttaǵy usynys-pikirlerdi eskerip, nasıhattaýymyz da kerek. Jerleý dástúrin birizdilikke túsirýdiń mańyzyn da ortaǵa salyp, aqsaqaldardyń pikirlerin tyńdaýymyz kerek», dedi oblystyq «Halıfa Altaı» meshitiniń bas ımam Ermek qajy Muqataı.
Bas ımam QMDB janynan «Qamqor-Sharapat» salttyq qyzmet kórsetý ortalyǵy qurylyp, jerleý rásimderin el kóleminde bir júıege túsirý jóninde О́skemen aımaǵynda jumystardyń qolǵa alynǵanyn atap ótti. Ras, О́skemenniń irgesindegi musylman zıratynda qorshaýlar bir úlgide qalanyp, bir tıptes taqta tastar qoıylady.
Jıynda birqatar qarııa kóterilip otyrǵan máselege baılanysty óz oılaryn ortaǵa salyp, taǵy da usynystar bildirdi. Atap aıtqanda aqsaqaldar keńesiniń tóraǵasy Manarbek Muhamedjanov óz sózinde QMDB tarapynan aqsaqaldar ınstıtýtyn qoldanysqa engizip, ulttyq qundylyqtarǵa basymdyq berýge talpynyp otyrǵandyǵy quptarlyq bastama dep atap ótti. Al Qazaqstannyń Mádenıet qaıratkeri Nábıolda Kemeshev ólimdi jerde ysyrapshyldyqty áli de azaıtý kerektigin sóz etti. «Jerleý rásimderin birizdilikke túsirip, ysyrapqa jol bermeı, burynǵy salt-dástúrdi jańǵyrtýymyz kerek. Qazirden bastap, osy máseleni túbegeıli retteıik. Marqumdy shyǵaryp salý rásimi baılyq jarystyratyn formatta emes, ótken adamǵa qurmet kórsetýdiń ónegesin kórsetý baǵytynda bolǵany durys. Mysaly, «Halıfa Altaı» meshitiniń qatymhanasynda taǵam túrleri yqshamdaldy», deıdi Nábıolda Kemeshov.
Forýmda sóz alǵan qarııalar salt-dástúrdi jańǵyrtý maqsatynda istelip jatqan jumystarǵa ótken jyldardaǵy forýmdardyń da yqpaly bar ekenin aıtyp ótti.
Shyǵys Qazaqstan oblysy