О́skemen qalasyndaǵy «Kazsınk» zaýytynda bolǵan jarylys pen órtten keıin Shyǵys Qazaqstan oblysy polısııa departamenti sotqa deıingi tergeýdi bastady, dep jazady Egemen.kz.
Polısııa málimetinshe, tergeý eńbekti qorǵaý erejeleriniń buzylýy saldarynan eki nemese odan da kóp adamnyń qaza bolýy faktisi boıynsha bastalǵan.
«Oqıǵa ornynda tergeý-jedel toptar iske kiristi, jaǵdaıdyń mán-jaıyn anyqtaý úshin birden tergeý áreketteri júrgizilip jatyr», delingen habarlamada.
Aıta keteıik, búgin Tótenshe jaǵdaılar mınıstrligi О́skemendegi zaýytta jarylys bolǵanyn habarlady.
Keıinnen jarylystan zardap shekken tórt adam aýrýhanaǵa jetkizilip, 2 adam qaza tapqany belgili boldy.
Sondaı-aq zaýytta úıindilerdi arshý jumystary júrgizilip jatyr. Al Úkimet otyrysynda Premer-mınıstr Oljas Bektenov jaǵdaıdy jeke baqylaýyna alǵanyn aıtty.