Bul kúnderi Túrkııanyń Ystanbul qalasynda kúres túrlerinen Iаshar Doǵý, Vehbı Emre jáne Hamıt Kaplan syndy dańqty balýandardy eske túsirýge arnalǵan halyqaralyq týrnır ótip jatyr. Atalǵan jarysta álemniń kóptegen memleketinen kelgen dúldúldermen qatar bizdiń eldiń órenderi de baq synaýda.
Joǵaryda atalǵan úsh azamattyń da esimderi álemdik sport tarıhynda altyn áriptermen jazýly. Máselen, Iаshar Doǵý – II Dúnıejúzilik soǵys aıaqtalǵan tusta Túrkııa sportynyń sımvolyna aınalǵan tulǵa. Ol erkin kúresten 1948 jyly London Olımpıadasynyń jeńimpazy jáne álem jáne Eýropanyń eki dúrkin chempıony atandy. Grek-rım kúresinen qurlyq birinshiliginde bir altyn jáne bir kúmis medal oljalady. Hamıt Kaplannyń da halyqaralyq arenada qol jetkizgen tabystary tolaǵaı. Ol da kúrestiń eki túrin jetik meńgerdi. Hamıt qatarynan úsh Olımpıadada (1956 jyly – altyn, 1960 jyl – kúmis, 1964 jyl – qola ) oljaǵa keneldi. Kaplannyń álem chempıony jáne álem kýbogynyń ıegeri degen ataqtary taǵy bar. Vehbı Emreniń de baǵyndyrǵan belesteri bir tóbe. Mine, ótken aptada Anadoly eliniń abyroıyn osyndaı dańqy alysqa jaıylǵan sańlaqtardyń memorıalynda tórtkúl dúnıeniń beldi balýandary bas qosty.
Jarysty grek-rım kúresi sheberleri bastady. Alǵashqy kúni 60 kılo salmaqta beldesken aǵaıyndy Fıdahmetovter óz jankúıerlerin qýantty. Bastapqy básekelerde qarsylastaryn qapy qaldyrǵan qos jerlesimiz jartylaı fınalda ózara sheberlik baıqasty. Bul tartys Ernardyń paıdasynan sheshildi. Fınalda ol Ekrem О́ztúrikti oısyrata utyp, bas júldeni oljalady. Taǵy bir jergilikti sportshy Ahmet Uqardy utqan Ernat qola medal ıelendi.
55 kılo salmaqta kúresken Amanǵalı Bekbolatov aqtyq synǵa deıin alqynbaı jetkenimen, sheshýshi tusta Túrkııanyń myqtysy Ádem Buraq Uzynǵa ese jiberdi. Alǵashqy aınalymdarda ázerbaıjandyq Namaz Rýstamov pen óziniń komandalyq áriptesi Danııar Qalenovten aılasyn asyrǵan, 67 kılo salmaqtaǵy Meıirjan Shermahambet jartylaı fınalda Eýropa chempıony, norvegııalyq Morten Toresenge jol berdi. Úshinshi oryn úshin tartysta qyrǵyzstandyq Qaly Sýleımenovke san soqtyrǵan qandasymyz qola medaldy moınyna ildi.
Kelesi kúni taǵy úsh salmaq dárejesiniń júldelerin sarapqa salynǵanymen, tek Temirlan Shadýkaev júldegerler sanatynan kórindi. 77 kılo salmaqtyń qola medali úshin básekede ol álem chempıony, serbııalyq Vıktor Nemeshten basym tústi. Sol keshte Demeý Jadyraev (77 kılo) jáne Ilımdor Sataev pen Rahmet Sápıevtiń (82 kılo) de jeńis tuǵyryna kóterilýge jaqsy múmkindikteri boldy. Biraq sheshýshi tusta óz qarsylastaryna ese jibergen bul balýandar besinshi oryndardy qanaǵat tutty.
Grek-rım kúresinen ótken jarystyń jeńimpazdary:
55 kılo – Ádem Buraq Uzyn (Túrkııa), 60 kılo – Ernar Fıdahmetov (Qazaqstan), 63 kılo – Islomjon Bahramov (О́zbekstan), 67 kılo – Mahmud Bahshıloev (О́zbekstan), 72 kılo – Seljýk Kan (Túrkııa), 77 kılo – Iýnýs Emre Bashar (Túrkııa), 82 kılo – Burhan Aqbodaq (Túrkııa), 87 kılo – Islam Abbasov (Ázerbaıjan), 97 kılo – Rýslan Assaqalov (О́zbekstan) jáne 130 kılo – Islam Iyldyrym (Túrkııa).