Beıjińde ótken qysqy Olımpııa oıyndarynyń shaıbaly hokkeıshiler saıysynda Slovakııa quramasy óz tarıhynda tuńǵysh ret qola medal ıelengeni belgili. Kanadalyq maman Kreıg Edvard Remzı jetekshilik etken komandanyń sapynda Nur-Sultannyń «Barys» klýbynyń shabýylshysy Tomash Iýrcho da óner kórsetti. Al biz sol oıynshy jaıynda ne bilemiz?
Tomash Iýrcho 1992 jyldyń 28 jeltoqsanynda burynǵy Chehoslovakııanyń Koshıse qalasynda dúnıege keldi. Bala kezinen hokkeıge qyzyqqan ol 16 jasynda Kanadaǵa attanyp, túrli ortańqol klýbtarda óner kórsetti. Arada tórt jyl ótkennen soń Ulttyq hokkeı lıgasyndaǵy (UHL) maıtalman mamandardyń qyraǵy nazaryna ilikti. Sodan bes maýsym boıy «Detroıt Red Ýıngz» ben «Chıkago Blekhokstyń» namysyn qorǵady. 2019-2020 jyldar aralyǵynda Iýrcho «Edmonton Oılerzde» oınady. UHL-da ol barlyǵy 223 ret muz aıdynyna shyǵyp, 54 upaı (23 gol+31 pas) jıdy. Amerıkalyq hokkeı lıgasynda (AHL) 240 kezdesý ótkizip, 169 upaıdy (82+87) enshiledi.
Byltyr Tomash «Barystyń» jeıdesin kıdi. Qazaqstanǵa kelgen bette óreli ónerimen kózge túsip, san ret jergilikti jankúıerlerdi qýantty. Onyń Qurlyqtyq hokkeı lıgasyndaǵy (QHL) aıshyqty oıyny mamandar tarapynan oń baǵalanýda. Sol kezden beri 17 márte muz aıdynyna shyqqan slovakııalyq shabýylshy qarsylastar qaqpasyn 3 ret dál kózdep, 8 ret nátıjeli pas berdi. Barlyǵy – 11 upaı.
О́z eliniń ulttyq quramasy sapynda Tomash Iýrcho 2014 jyly Sochıde alaýy tutanǵan Olımpııa oıyndaryna qatysty. Ol jarysta Slovakııa 11-oryndy qanaǵat tutty. Iýrcho tórt básekede bir ret nysanany dál kózdedi. 2015, 2016 jáne 2018 jyldary uıymdastyrylǵan álem chempıonattarynda baq synaǵan hokkeıshi 11 matchta (2+7) 9 upaı jıdy. Odan bólek, Tomash jasóspirimder men jastar arasyndaǵy dúnıejúzilik dodalarda da óner kórsetti.
Osyǵan deıin Olımpııa oıyndaryna jeti márte qatysqan Slovakııa eń úzdik nátıjege 2010 jyly Vankýverde qol jetkizdi. Jartylaı fınalda kanadalyqtardan (2:3) utylǵan olar qola medal úshin tartysta Fınlıandııaǵa (3:5) jol bergen edi. 2006 jyly Týrınde besinshi oryn alsa, 1994 jyly Lıllehammerde altynshy satyǵa taban tiredi.
Beıjińde Slovakııa quramasynyń baǵy jandy. Toptyq týrnırde fınder (2:6) men shvedterge (1:4) ese jiberip, Latvııany (5:2) oısyrata utty. Sońǵy oıynda Iýrcho bir gol soǵyp, bir ret nátıjeli pas berdi. Pleı-off saıysynda olar Germanııanyń qaqpasyna jaýapsyz tórt shaıba saldy. Shırek fınalda AQSh-tan (3:2) býllıt soǵý barysynda basym tústi. Jartylaı fınalda fınderge (0:2) álderi jetpedi. Al úshinshi oryn úshin básekede Shvesııaǵa (4:0) shań qaptyryp ketti. Osylaısha, Slovakııa hokkeıshileri Olımpııa oıyndarynyń qola júldegeri atandy. Dáp qazirgi kezde qazaqstandyq jankúıerler de ǵalamdyq dodada úshinshi orynǵa taban tiregen komandanyń sapyndaǵy «Barystyń» oıynshysy Tomash Iýrchony Beıjińdegi tolaǵaı tabysymen quttyqtaýda.