Almatyda 1 adamnyń ólip, 5 adamnyń jaraqat alýyna aparyp soqtyrǵan jol-kólik oqıǵasyn jasaǵan Maqsat Úsenovtiń isine Bas prokýratýranyń aralasa almaýynyń dáleldi sebepteri boldy. Bul týraly Bas prokýrordyń orynbasary Nurmahanbet Isaevtyń sózine silteme jasaǵan Tengrinews.kz tilshisi habarlady.
«Bizge: «Prokýror qaıta qarap otyr? Ol nege istiń qysqarýyna jol bergen?» degen saýaldar qoıylyp jatady. Al prokýror zańǵa (Qylmystyq kodekstiń 67-baby) qaraıdy. Ol qandaı bir prokýror bolsa da, óziniń qyzmettik ýákildigin asyra paıdalanyp, zardap shegýshilerdiń ymyraǵa kelýlerimen istiń qysqaryp ketýine toqtaý sala almaıdy», - dep túsindirdi ol joǵaryda atalǵan jol-kólik oqıǵasyna baılanysty.
Bas prokýrordyń orynbasary kúni keshe Elbasy Nursultan Nazarbaevtyń Almaty qalasynyń damýyna arnalǵan keńeste sóılegen sózinde belgili kisilerdiń jol-kólik oqıǵalaryn jasaǵan balalarynyń qatań jazaǵa tartylýlary kerek ekenin aıtqanyn baıandady. «Memleket basshysynyń tapsyrmasyna sáıkes, bir kúnniń ishinde 67-bapqa engiziletin ózgeris daıyndalyp qoıyldy. Men jýyq arada bul norma qabyldanady dep oılaımyn. Sol kezde qylmystyq ister boıynsha jurttyń ymyragershilikke barýlaryna jol berilmeıdi. Men muny ádil sheshim dep oılaımyn», - dedi Isaev.
Eske sala keteıik, joǵaryda aty atalǵan Maqsat Úsenov 2013 jylǵy 1 jeltoqsan kúni tań aldynda Almatydaǵy «Selınyı» kınoteatrynyń mańynda aıaldamada turǵan eki jigit pen tórt qyzdy qaǵyp ketedi. Osy jol-kólik oqıǵasy saldarynan bir jigit qaza taýyp, qalǵan beseýi ártúrli jaraqat alady. Al osyndaı qylmys jasaýshy júrgizýshi oqıǵa bolǵan jerden qashyp ketedi. Alaıda, keıin qashqyn qolǵa tústi.
Bul oqıǵa artynsha jurtshylyq arasynda úlken rezonans týǵyzdy. Osynyń saldarynan Maqsattyń «Astana EKSPO-2014» ulttyq kompanııasynda basshy qyzmet atqaratyn ákesi Qajymurat Úsenov qyzmetinen ketýge májbúr boldy. Biraq jigittiń ózi jazadan aman qaldy. Buǵan zardap shekkender jaǵynyń keshirim bergeni sebep bolǵan sııaqty. Sonda da bolsa, sońynan qaza tapqan 23 jasar Murat Qarabalınniń anasy óziniń mundaı ymyraǵa barmaǵanyn talaı aıtty. Alaıda, bul janaıqaı sottardyń qulaǵyna barmaǵan sııaqty. Taraptar kelisimge keldi degen túıinmen is qysqardy. Sosyn prokýratýranyń narazylyǵy boıynsha Úsenov 48 kúnge túrmege qamaldy.
Jaqynda Maqsat túrmeden shyqty. Ony týǵan-týystary túrmeniń aldynan kútip alyp, birneshe kólik bolyp tizilgen kortejben alyp ketti.
Qurysh Nurymbet.
Derkkóz: tengrinews.kz.
Foto: tengrinews.kz.