Qasym-Jomart Toqaevtyń tóraǵalyǵymen elimizdegi jetekshi partııanyń kezekten tys sezi ótti. «Qasiretti qańtar» oqıǵalarynan keıin Prezıdent eldegi barsha saıası ınstıtýttardy, onyń ishinde Nur Otan-dy jańartýǵa myqtap kiriskeni belgili.
Partııa basshylyǵynyń aýysyp, zaman talabyna saı ózgere bastaǵany sonyń aıǵaǵy. Onsyz oryn alǵan qasirettiń aldaǵy ýaqytta qaıtalanýyna jol bermeı, ádil de gúldengen qoǵamǵa qol jetkizý múmkin emes. Tıisinshe «Jańa Qazaqstan» tujyrymdamasy halyq ıgiligi turǵysyndaǵy naqty istermen ǵana baıandy bolmaq.
Alaıda atalǵan mindet keıbir sholaq belsendilerdiń aıtýynsha, qolda bardy túgelimen ysyryp qoıyp joqtan bastaýmen nemese qur aıqaıshyldyqpen sheshilmeıdi. Qaıta eldi jikke bólip álsiretý qazirgi kezeńniń ishtegi de, syrttaǵy syn-qaterlerine tótep berýge kedergi keltiredi. Bul tyǵyryqqa tireıtin jol ekenin Alashtyń keshegisi men Reseıdiń búgini kórsetti.
Olaı bolsa enshimizdegi mırasty talan-tarajǵa salmaı saqtap, kerek bolsa kemshin tustaryn túzetip, keler urpaqqa tapsyrý kerek. Partııanyń jańasha AMANAT dep atalýy men osy abyroıly mińdettiń, sondaı-aq saılaýshylardyń amanatyn oryndaý arasynda aıqyn úndestik baıqalady. Partııanyń qaıta qurý baǵdarlamasyna toqtalar bolsaq, ol naqty ári jan-jaqty, sonymen qatar kez kelgen qatardaǵy múshe men azamat baqylaı alatyn sharýalar jospary bolyp tabylady.
Ashyqtyq, ádildik, memleketshildik qaǵıdattary AMANAT partııasynyń eń tómengi birlestikterinen bastap Májilistegi fraksııa deńgeıine deıin buljytpaı saqtalynbaq. О́z kezeginde budan bylaı partııanyń Prezıdent ne Tóraǵa emes, ulttyq múddeniń, atap aıtqanda Jańa Qazaqstan ıdeıasynyń aınalasynda toptasýy qajet. Sebebi 30 jyldyq tarıhynda Qazaq memleketindegi partııa ataýlylar negizinen jekelegen kóshbasshylardyń raıyna qaraı qurylyp, elden góri solardyń sózin sóılep keldi. Meıli bılikte bolsyn ıá, oppozısııa qanatynda bolsyn.
Al endi osyndaı oıyn erejelerine ıkemdelgen ortada naǵyz saıası básekelestik pen demokratııanyń ornaýy ekitalaı. Olaı bolsa qazaqtyń qoǵamdyq alańynda oryn tepken saıası kúshter eski alys-julysty, bir-birin qaralaýdy qoıyp, jańashyldyq talabyna saı boı túzegeni abzal. Kóktemniń alǵashqy kúni bastaý alyp jatqan oń úrdisti jaqsylyqqa jorıyq.
Rasýl JUMALY,
saıasattanýshy