Almatyda qańtar aıyndaǵy oqıǵalar kezinde urlanǵan qarýdyń iri partııasy tárkilendi. Bul týraly QR IIM kóliktegi polısııa departamenti habarlady, dep jazady Egemen.kz.
Kóliktegi PD bastyǵy Ońal Bekıevtiń aıtýynsha, kólik polısııasy qyzmetkerleri tárkilegen qarýdyń iri partııasy Almatyda 5-6 qańtarda bolǵan jappaı tártipsizdik kezinde qarý-jaraq dúkenderinen urlanǵan.
«Almatyda qarý-jaraq dúkenderine shabýyl jasaǵany úshin eki er adam ustaldy. Almaty áýejaıyndaǵy jappaı tártipsizdikterge qatysqan О́zbekstannyń 23 jastaǵy azamaty urlyq jasady degen kúdikke ilindi. Onyń turǵylyqty jeri boıynsha eki pyshaq pen bir pnevmatıkalyq tapansha tárkilendi», dedi Ońal Bekıev.
Sondaı-aq polısııa tintý kezinde 19 dana pnevmatıkalyq qarý men onyń patrondary, 10 pyshaq, bir krest, alty optıkalyq nysana jáne úsh optıkalyq qurylǵy tárkilengen 43 jastaǵy kúdiktini anyqtap, ustady.
«Atalǵan fakti boıynsha sotqa deıingi tergeý bastaldy, kúdiktilerdiń basqa qylmystarǵa qatystylyǵy tekserilýde. Olardyń sybaılastaryn anyqtaý jáne ustaý boıynsha sharalar qabyldanýda», dedi Ońal Bekıev.