Aralas jekpe-jek álemindegi eń úzdik bes promoýshenniń biri – Reseıdiń ASA lıgasy aldaǵy aılarda jeńil salmaqta kúsh synasyp júrgen eń myqty segiz sportshynyń basyn qosyp, jaqsy bir jarystyń jalaýyn jelbiretýdi kózdep otyr. Sol dúbirli dodada bizdiń Artem Reznıkov ta óner kórsetedi.
Artem Reznıkov – Shyǵys Qazaqstan oblysyndaǵy Rıdder qalasynyń týmasy. Jasy 30-da. Bozbala shaǵynda erkin kúreske myqtap den qoıǵan ol birqatar jarysta júlde aldy. Sodan keıin «Sońǵy ımperator» atanǵan dańqty sportshy Fedor Emelıanenkoǵa eliktep, aralas jekpe-jekpen aınalysty. Bul rette de Artem eleýli tabystarǵa qol jetkizdi. 10 jyldan astam ýaqyt ishinde 28 kezdesý ótkizip, 22 ret jeńiske jetti. 17 qarsylasyn esinen tandyrdy. 70 kılo salmaqta kúsh synasyp júrgen jerlesimiz alǵashqy toǵyz jekpe-jeginde jeńiske jetse, onynshy márte oktagonǵa shyqqanda reseılik Georgıı Kıchıgınge upaı sanymen ese jiberdi. Odan keıin ol taǵy bes básekeni óz paıdasyna sheshti.
A.Reznıkovtiń sporttyq ǵumyrynda quldyraý kezeńi de boldy. 2016-2017 jyldary ol qatarynan bes kezdesýde jeńilistiń kermek dámin tatty. Biraq bul jaǵdaı jerlesimizdiń jigerin jasytqan joq. Kerisinshe, ár sátsizdikten sabaq alǵan Shyǵystyń shymyr jigiti odan keıingi segiz básekede óziniń ústemdigin pash etti. Iаǵnı 2017 jyldyń qarasha aıynan beri ol eshkimnen jeńilgen joq. Reznıkovten taıaq jegender arasynda reseılik Mıhaıl Balakırev, Hasan Halıev, Hamzat Aýshev, Iýsýf Raısov jáne taǵy basqa tanymal sportshylar bar. Qazirgi kezde otandasymyz ASA reıtınginde úshinshi oryndy ıelenýde. Qazirgi kezde kóptegen jankúıer Artemniń jeńil salmaqtyń úzdigi Abdýl-Ázız Abdýlvahabovpen chempıondyq belbeý úshin ótetin básekesin taǵatsyzdana kútýde.
Atalǵan jarysqa qatysatyn segiz sportshynyń ázirge altaýynyń ǵana esimi belgili. Solardyń qatarynda Artem Reznıkovten bólek, amerıkalyq Lýıs Penıa, brazılııalyq Hakran Dıas, reseılik Alı Bagov, Edýard Vartanıan jáne Iýsýf Raısov syndy sportshylar bar. Bul jigitterdiń barlyǵy da «kimmen bolsa da aıqasýǵa daıarmyz» dep julqynyp tur.
28 jastaǵy Lýıs Antonıo Penıa Italııanyń Neapol qalasynda dúnıege kelgen. Keıinnen Amerıkaǵa qonys aýdaryp, AQSh-tyń azamattyǵyn aldy. Laqap aty – «Ashýly» («Violent»). Barlyǵy 14 márte jekpe-jekke shyqqan ol 10 ret jeńis toıyn toılady. Sońǵy toǵyz kezdesýin Penıa UFC-de ótkizdi. Lýıs – «qylqyndyrý» ádisin oryndaýdyń has sheberi.
Hakran Dıastyń jasy – 37-de. Ol Rıo-de-Janeıro qalasynda týyp-ósti. Djıý-djıtsýdy jetik meńgerip, qara belbeý ıegeri atanǵan brazılııalyq osy sport túrinen úzdiksiz ótip turatyn jarystarǵa sonaý 2005 jyldan beri qatysyp keledi. 2012-2017 jyldar aralyǵynda Dıas ta UFC-de óner kórsetti. Barlyǵy 34 ret oktagonǵa shyqqan Ońtústik Amerıka oǵlanynyń 26 ret mereıi ústem boldy. Sol básekeleriniń teń jartysyn ol merziminen buryn aıaqtady.
31 jastaǵy Alı Bagov – Qabarda-Balqardyń týmasy. Ol – djıý-djıtsýdan álem chempıony, grepplıngten dúnıejúzilik áskerıler oıyndarynyń jeńimpazy. Aralas jekpe-jekpen 2009 jyldan beri aınalysyp júrgen Alı 42 márte aıqas alańyna shyǵyp, 31 ret kózdegen maqsatyna qol jetkizdi. Segiz saıysty aıqyn basymdyqpen aıaqtady. Osydan 12 jyl buryn Bagov jas juldyz Habıb Nýrmagomedovpen sheberlik baıqasyp, odan upaı sanymen utyldy.
30 jastaǵy Edýard Vartanıan Erevanda týdy. Erterekte ol ata-anasymen birge Máskeýdiń irgesindegi Vıdnoe qalasyna kóship bardy. Ol sambodan Álem kýbogynyń ıegeri atansa, taı-bokstan Reseı chempıonatynda top jardy. Oktagonǵa 26 márte shyqqan Vartanıan 22 ret ústemdik tanytty. Sol básekelerdiń teń jartysynda qarsylastaryn esinen tandyrdy.
Iýsýf Raısovtyń esimi bizdiń jankúıerlerge jaqsy tanys. Cheshenstanda soǵys bastalǵan kezde bolashaq sportshynyń áke-sheshesi Reseıdiń Saratov oblysyna qonys aýdardy. Sol jerde Iýsýp dúnıe esigin ashty. Jaýyngerlik sambony jaqsy meńgergen ol 2014 jyly aralas jekpe-jekten óziniń tusaýkeser kezdesýin ótkizdi. Sodan beri 20 ret aıqas alańyna shyǵyp, sonyń tek ekeýinde ǵana utyldy. 11 básekeni merziminen buryn aıaqtady. «Borz» («Qasqyr») degen búrkenshik esimdi ıemdengen 26 jastaǵy sportshynyń joly qazaqstandyqtarmen eki márte qıysty. Osydan segiz jyl buryn astanada ol Jumakeldi Jalǵasulyn jeńse, 2020 jyldyń kúzinde Máskeýde Artem Reznıkovqa ese jiberdi. Kezinde Iýsýp jartylaı orta salmaqta atalǵan lıganyń chempıondyq belbeýin ıelendi.
Aldaǵy ASA týrnırinde segiz sańlaq ústimizdegi jyldyń sońyna deıin bir-birimen aıqasyp, solardyń arasynda kimniń myqty ekeni anyqtalady. Bas júldeni oljalaǵan sportshy 200 myń dollar kóleminde syıaqy alady. О́zge jigitter de quralaqan qalmaıdy. Olar da ózderiniń jetken mejelerine sáıkes aqshalaı syılyqqa ıe bolady. Al osy jarystyń jalpy júlde qory 800 myń dollardy qurap otyr.