Bas prokýror Berik Asylov ulttyq qaýipsizdik komıtetiniń burynǵy tóraǵasy Kárim Másimov, úsh orynbasary men bólim basshysyna qandaı jaza taǵaıyndalýy múmkin ekenin aıtty, dep habarlaıdy Egemen.kz.
Ulttyq qaýipsizdik komıtetiniń burynǵy tóraǵasy Kárim Másimov, úsh orynbasary men bólim basshysyna qatysty birneshe is qozǵalyp, tergelip jatyr.
«Onyń ishinde, memleketke opasyzdyq jasaý, bılikti kúshpen basyp alý, bılikti asyra paıdalaný jáne para alý boıynsha qylmystyq ister bar. Burynǵy tóraǵa men onyń orynbasarlary qamaýda. Olardyń áreketine quqyqtyq baǵany sot beredi dep oılaımyn. Biraq aldyn ala aıtatyn bolsaq, bul qylmystar úshin Qylmystyq kodekspen 17 jylǵa deıin bas bostandyǵynan aıyrylýy múmkin. Tergeý jumystary áli júrip jatyr», dedi Berik Asylov.