Soltústikqazaqstandyqtar jyl ótken saıyn mindetti áleýmettik medısınalyq saqtandyrýdyń (MÁMS) paıdasyn artyǵyraq kórip keledi. Máselen, 2020 jylmen salystyrǵanda byltyr MÁMS júıesi boıynsha kórsetilgen konsýltatıvti-dıagnostıkalyq kómek 1,3 ese artqan. Sonyń ishinde KT, MRT apparattarynyń asa qymbat qyzmetteri 23 600 ret kórsetilgen. Al bul – 2020 jylǵydan 3,5 ese artyq. Sóıtip, oblys turǵyndary ózderiniń 473 mln teńge shyǵyndaryn únemdep qaldy.
Joǵary tehnologııany qoldaný arqyly bolatyn qymbat operasııalar MÁMS-tiń kómegimen 23 ret jasalǵan, sonyń 16-sy – júrekke jasalǵan kardıohırýrgııalyq otalar. Al mundaı otalardy halyq óz qaltasynan jasatsa, orta eseppen 3,6 mln teńge tólegen bolar edi.
2021 jyly bizdiń oblysqa MÁMS aıasynda «Ańsaǵan sábı» arnaıy baǵdarlamasy boıynsha 217 kvota bólingen. Baǵdarlama boıynsha 213 áıel oń nátıjemen ótken. Bul baǵdarlama jumysynyń tıimdiligin kórsetedi. 2022 jylǵa 203 kvota bólindi.
Jýyrda brıfıng ótkizgen «Áleýmettik medısınalyq saqtandyrý qory» Soltústik Qazaqstan oblystyq fılıalynyń dırektory Larısa Gordeeva men osy fılıaldyń bólim basshysy Qarlyǵash Ilııasova «Ańsaǵan sábı» baǵdarlamasyna erli-zaıyptylardyń qatysý joldarynyń tártibin de táptishtep baıandap berdi. Búgingi tańda Qazaqstanda reprodýktıvtik medısınanyń 24 ortalyǵy bar eken.
Qazir Soltústik Qazaqstan oblysynda 600 myńǵa jýyq turǵyn bolsa, sonyń 78 paıyzy, ıaǵnı 440 myńdaı adam MÁMS-pen qamtylǵan. Bul sandardyń ishinde qorǵa jarna tóleýden bosatylǵan jeńildik kategorııasyndaǵy 280 myńdaı adam da kirip otyr. Olar úshin jarnany memleket tóleıdi.
Alaıda 2021 jyly eńbekke jaramdy adamdardyń 86 myńy qorǵa jarna tólemegen. Jasalǵan sarapqa qaraǵanda, mundaılar 30 ben 40 jas arasyndaǵy barlyq jarna tólemegen azamattyń 32 paıyzyn qamtıdy. Al 41 men 50 jas aralyǵyndaǵylar – 25 paıyzdaı.
Spıkerlerdiń aıtýynsha, qorǵa túsetin barlyq qarjy jınaqtalýdy maqsat etpeıdi, ol pasıentke jedel kómektesý úshin jumsalady. Sonymen qatar pasıenttiń ózi tirkelgen emhanada jalpy, tájirıbelik dárigerdi tańdaýyna qatysy bar ekeni aıtyldy. Osy qor arqyly emdeýge respýblıka boıynsha 4 myńdaı jekemenshik emhanalar da qatysady. Sonyń 16-sy Soltústik Qazaqstannyń aýmaǵynda ornalasqan. Atap aıtqanda, Petropavl qalasynda «Aına-kóz» kóz emdeý ortalyǵy», «Formýla zdorovıa» JShS, «Nefros-SK» JShS, «Úmit Soltústik» JShS, «Panaseıa» otbasylyq medısına ortalyǵy» JShS jáne t.b. Halyq arasynda bulardyń emine aıtylǵan rızashylyqtardy jıi estımiz.
Árıne, mundaı qorlardyń bolǵany, halyqty emdeýge qyzmet etkeni jaqsy ǵoı, biraq sondaılar aqsha alǵanymen, árbir pasıenttiń quqyn qorǵap, emdelýine múmkindik týdyra ma degen suraqtar qoıylǵan edi. Bul rette árbir em oryndarynda pasıentti qoldaý jáne ishki saraptama qyzmeti bar ekeni aıtyldy.
«Bul qyzmet medısınalyq qyzmet kórsetý tolyǵymen standartqa saı bolýyn baqylaıdy. Eger pasıenttiń emhanaǵa shaǵymy bolsa osy qyzmetke qaıyrylýy kerek. Al eger bul qyzmet máseleni sheshe almasa, MÁMS qorynyń ózine fms.kz saıty arqyly (Call ortalyǵy 1406) shaǵym jasaı alasyz», dedi L.Gordeeva.
PETROPAVL