Ahmet Baıtursynulynyń mynandaı bir jaqsy sózi bar. «El basshysy, memleket basqaratyn adamdar sharýashylyqty jaqsy bilip, jaqsylyqtyń dıqanshysy bolýy kerek» dep aıtqan eken. Sondyqtan keshegi Joldaýda Ahańnyń doktrınasynan týyndaıtyn ulttyq múddege baǵyttalǵan, saıası kóptegen bastama aıtyldy.
Ulttyq qoǵamdyq senim keńesi aıasynda osy usynystardyń kóbisi usynylǵan, pysyqtalǵan. Kóptegen memlekettik apparat turǵysynan suraqtar qoıylyp, qarsy pikirler aıtylǵan. Sonyń iriktelgen, tujyrymdalǵan, pysyqtalǵan túıini saıası qujat retinde jarııalandy.
Osy oraıda úsh máseleni aıtqym keledi. Birinshi, 1205 jyly Iassy, Shyńǵys han qujaty ómirge keldi. 1215 jyly Ulybrıtanııanyń «Uly erkindik hartııasy» qabyldandy. Bir qyzyǵy eki qujat ta bir mezgilde qabyldandy. Ulybrıtanııa qujatynda koroldi shekteý máselesi qoıylǵan. Al Prezıdent Joldaýynda óz ókilettigin jeti baǵyt boıynsha qysqartyp, Parlamentke nemese máslıhattarǵa berý joǵaryda aıtyp ótken eki álemdik quqyqtyq qujattyń jaqsy úılesip, Qazaqstan qoǵamyna engizý dep túsinemiz.
Ekinshi másele, jaqynda AQSh Kongresi Reseıden munaı satyp alýǵa embargo jarııalady. Sonda Kongrestegi talqylaý kezinde eki senatordyń pikiri unady. Olar Reseıge qarsy shekteý salǵanda Qazaqstan zardap shekpeı me dep alańdady. Demek AQSh kongresteri bizdiń múddemizdi qorǵap, jandary ashyp otyr. Osy oraıda, Parlamenttik tergeý fýnksııasyn bolashaqta pysyqtap, engizý kerek.
Úshinshi usynys, bizdiń Bıýdjet kodeksinde keńeıtilgen úkimettiń shyǵystary degen termın joq. Bul kún tártibine qoıylmaǵan, Úkimet múldem aıtpaıdy. Ekonomıka mınıstrligi múldem sóz qozǵaǵan emes. Álemde mynandaı zańdylyq bar. Úkimettiń keńeıtilgen shyǵystary 50 paıyzdan asyp ketse, sol memlekette ekonomıkalyq ósim qarqyny 5 paıyzǵa jetpeıdi eken. Bizdiń esepteýimiz boıynsha 2020 jyldyń qorytyndysynda mundaı shyǵyndar ishki jalpy ónimniń 62 paıyzynan asyp tústi. Al Prezıdenttiń basty paradıgmasy – kedeılikpen kúresý. Ekonomıkalyq ósim – kedeılikpen kúresýdiń eń úzdik joly. Bıýdjetten aqsha taratyp berý arqyly ýshyǵyp turǵan máseleni sheshýge bolady. Biraq uzaq merzimde turaqtylyqty saqtaý úshin joǵarǵy qarqyndy ekonomıkalyq ósim kerek.
Qaıyrbek ARYSTANBEKOV,
Ekonomıkalyq saıasat ınstıtýtynyń prezıdenti