Qazir ishki naryqta qolma-qol tólem jasaý úrdisiniń azaıǵany kádimgideı baıqalady. Kópshilik qyzmet pen taýar qunyn ne kartamen, ne smartfonmen tóleýge ádettene bastady. Sońǵy bes jylda bank kartasy sanynyń 3,5 ese kóbeıgeni de sózimizge anyq dálel.
2022 jyldyń 1 qańtaryndaǵy jaǵdaı boıynsha aınalymdaǵy karta sany 58 mln-ǵa jetken, ıaǵnı árbir qazaqstandyqqa úsheýden, al árbir ekonomıkalyq belsendi azamatqa 6 kartadan tıesili bolmaq. 2017 jyldary bul kórsetkish 1 jáne 2,2 karta bolǵanyn eskersek, bes jylda kartaǵa degen suranys ájepteýir artqanyn ańǵaramyz.
Sońǵy birer jyl kóleminde otandyq bank sektoryndaǵy zamanaýı qarjylyq tehnologııalyq ónimder men qyzmetterdiń paıda bolýy ishki básekeni kúsheıtti. Sonymen birge tutynýshylarǵa biraz jeńildik alyp keldi. El ishindegi kartalardyń 32,8 paıyzy jergilikti tólem júıelerine tıesili bolsa, 67,2 paıyzy halyqaralyq júıelerdiń enshisinde eken. Árıne, halyqaralyq tólem júıesimen biriktirilgen kartanyń artyqshylyǵy mol, ony ózge elde de paıdalanýǵa, halyqaralyq marketpleıster arqyly taýarlar men qyzmetter úshin aqy tóleı berýge bolady. Bul rette ondaı halyqaralyq marketpleısterdiń qazaqstandyq naryqta da tanymal bola bastaǵanyn aıtyp ótýge bolady. Máselen, AliExpress, Amazon, Wildberries jáne basqa da halyqaralyq platformalarda jahandyq tólem júıeleriniń kartalarymen ónim (qyzmet) satyp alýǵa múmkindik mol.
Finprom málimeti boıynsha, 2021 jyly qazaqstandyq bankterdiń kartalary arqyly shetelderde saýda jasaý kólemi 66,3 paıyzǵa ulǵaıyp, 967 mlrd teńgege jetken. Tranzaksııa sany 61,5-ten 90,5 mln-ǵa ósken. Bul ósim bıyl da baıqalady. Sonymen qatar Qazaqstannan tys aýmaqta kartalardan qarjy sheship alý kólemi de 27,7 paıyzǵa artyp, onyń mólsheri 206,6 mlrd teńgeni quraǵan. Qazir qazaqstandyqtar Mastercard, Visa, UnionPay jáne American Express sııaqty halyqaralyq tólem júıeleriniń kartalaryn belsendi paıdalanady jáne olar usynatyn jeńildikter men aksııalardy da tıimdi paıdalana bastaǵan.
«Qazir qazaqstandyqtar qolma-qolsyz tólem jasaý úshin qarjylyq ınfraqurylym usynatyn ádis-tásilderdi senimdi qoldanady. 2021 jyldyń qorytyndysy boıynsha POS-termınaldar arqyly iske asyrylǵan qolma-qolsyz tólem 487,8 mlrd teńgeni nemese búkil kólemniń 50,4 paıyzyn qurady. Onlaın-tásil, ıaǵnı ınternet nemese mobıldi telefon arqyly jasalatyn tólemderdiń úlesi 48,9 paıyzdy, 472,9 mlrd teńgeni quraıdy. Osylaısha, tólem kartalary el ishinde de, syrt memleketterde de ámııannyń ornyn tolyqqandy basty deýge negiz bar», dep jazady Finprom.
Reseı men Ýkraına arasynda týyndaǵan geosaıası ahýalǵa baılanysty Visa jáne Mastercard halyqaralyq tólem júıeleri Reseı aýmaǵynda qarjylyq operasııalardy doǵarǵandaryn málimdegen edi. Iаǵnı atalǵan tólem júıeleriniń kartalarymen reseılik dúkenderde tólem jasaýǵa, bankomattan aqsha alýǵa múmkindik joq.