Ras, bárin aıt ta, birin aıt, Memleket basshysy Qasym-Jomart Toqaevtyń Parlament palatalarynyń birlesken otyrysynda halyqqa arnaǵan Joldaýyndaǵy «Jańa Qazaqstandy birge quramyz!» degen bir aýyz sóziniń ózi el azamattaryna erekshe qýat bergeni kúmánsiz.
Elimizdiń damýyna asa qajet mańyzdy máselelerdi jiktep-jiktep, taldap-taldap aıta kelip, sóziniń sońyn: «Jańa Qazaqstan – jańarý men jańǵyrý joly, búgingi býynnyń bolashaq urpaqqa amanaty. Endeshe, Jańa Qazaqstandy birge órkendeteıik, aǵaıyn!», dep bir-aq aýyz sózben túıindedi. Kózi ashyq, kókiregi oıaý azamattarǵa osynyń ózi túsinikti bolsa kerek.
Qazaqstan azamaty retinde sol jan-jaqty jańarýdyń qataryna men baspasózdi de qosqan bolar edim. О́ıtkeni Memleket basshysynyń bul jerdegi «Qazaqstan saıası jańǵyrý baǵytyn jalǵastyrady. Bul meniń qaǵıdatty ustanymym» degen sózine oraı aıtpaq oıym edi.
Respýblıka kóleminde shyǵatyn basylymdardyń qaı-qaısysynyń bolsyn ortaq mindeti, quryltaıshylyq sıpatyna qaramastan, ol – Otanymyzdyń tynyshtyǵy, yntymaǵy men birligi baǵytynda úgit-nasıhat jumysyn júrgize otyryp, Memleket basshysynyń tapsyrmalary boıynsha jumys atqarý. Baspasóz qoǵamdyq pikir qalyptastyrýshy birden-bir utymdy qural retinde Qazaqstan halqyn Prezıdentimizdiń manyńa tyǵyz toptastyra túsýge úlesin qosýǵa tıis. Sondyqtan baspasózge júkteletin jaýapkershilik júgi, árıne, jeńil emes. Ol – birinshi kezekte qoǵam men bıliktiń arasyndaǵy altyn kópir. Naqty aıtqanda, bıliktiń kózi men sózi bolsa, ekinshi jaǵynan halyqtyń úni. Mine, osy mindetterdi shyn máninde júzege asyra bilgende ǵana biz aıtyp otyrǵan baspasózdiń bedeli qashanda joǵary bolmaq.
Endigi jerde Qazaqstandy tolyǵymen reformalaý barysynda buqaralyq aqparat quraldaryna da jańa mindetter júktep, olardyń jumysyna jańasha baǵyt-baǵdar beretin mezgil jetti. «Syn túzelmeı, min túzelmeıdi» degen emes pe, baspasóz aıtpaǵan syndy halyqtyń ózi-aq jaıyp salady. Ekinshiden, jýyrda baspasóz janrynyń túrlerin aıtyp bere almaǵan «jýrnalısti» kórip, tańǵalǵanym bar. Demek búgingi baspasóz kadrlarynyń bilim-biligin de qaıta qarap, myqty súzgiden ótkizetin reforma qajet.
Toqsan aýyz sózdiń tobyqtaı túıini, amanat partııasyn jan-jaqty jetildirip, maqsat-mindetterin qaıta qarap, onyń rólin arttyrý kerek. Sondaı-aq partııa músheleriniń atqaryp otyrǵan negizgi mindetterine degen jaýapkershiligin kóterý, sonymen birge jastar tárbıesine de basshylyq jasap, olardy óz qamqorlyǵyna alyp otyrýdy da osy partııanyń qolyna bersek, bul da jańara túskenimizdiń bir beligisi bolar edi. О́ıtkeni jastar tárbıesi belgili bir qoǵamdyq uıymnyń basshylyq-baqylaýynda bolǵany durys dep sanaımyn.
Serikbaı TURJAN,
Qazaqstannyń qurmetti jýrnalısi
Túrkistan oblysy,
Báıdibek aýdany