El qatarly Naýryz merekesin atap óttik. Jyldaǵydaı Táýelsizdik alańyna jaǵalaı alqa qotan aqshańqan, alty qanatty kıiz úıler qurylypty. Sarǵaıa tosqan, saǵyna kórisken Naýryz toıynyń jyp-jyly áserinen bolar, el kóńili kóterińki. Án shyrqalyp, kúı tartylyp jatyr. Ulttyq oıyndar oınatylýda. Álmısaqtan jalǵasyp kele jatqan salt-dástúr kórsetildi.
О́ńi ózgergen ózgeris kóre almadyq. El nazaryna usynylǵan salt-dástúr báz-baıaǵy qalpynda. Esh ózgeris joq. Qyz uzatyp, kelin túsirip, tusaý kesip, besikke salyp jatqan jalpaq jurt. Aq shańqan kıiz úılerdiń ishinde ne bar ekeni belgisiz. Bir kese kójelik bedeli barlar kirip-shyǵyp jatyr. Dáriptegen dástúrimiz ábden jaýyr boldy. Qazaq túgil qaımana jurt jatqa biledi. Bálkim endigi arada ómirdiń ózinen oıyp turyp oryn alýǵa tıisti dúnıeni qaıta-qaıta kórsetýdiń qajeti de joq shyǵar. Jalpaq jurtqa jón aıtyp turǵandardyń ózi dástúrdiń dámin tushyna bermeıtin syńaıly. Áne jigit aǵasy jasyndaǵy azamat kıiz úıdiń esigin kerip, aınalaǵa beımaral kóz salyp tur.
– Bosaǵany kerme, – dedi aq jaýlyqty ájeı irgeden aıǵaı salyp.
Biletin edik. Biraq uıat ta bolsa moıyndaýǵa týra keldi. Eptep ájeıge jaqyndadyq. Bala kezimizden kókirekke sińgen yrymnyń mánin suradyq. Ájeı sony da bilmeısińder me degendeı tańyrqaı qarady.
–Úıge kelgen adam esh ýaqytta tabaldyryqta turyp sharýasyn aıtpaıdy ǵoı, – dedi ol, – bul qonaqjaı, birin-biri aǵaıyn-týys sanaıtyn ulttyq bolmysymyzǵa jat kórinis. О́kpek jolaýshynyń ózin tórge shyǵaryp, dám tatqan soń baryp kelgen sebebin suraıdy. Al el shetine jaý kelgen alas-kúleste jaýshy kıeli tabaldyryqty basyp, bosaǵany kerip turyp sýyq habaryn jetkizgen. Keıinginiń de bile júrgeni durys.
Sál uzadyq. Taǵy bir kórinis. Bul joly jas kelin besik terbetip otyr eken. Syzyla shyrqaǵan besik jyry qandaı tátti. Tula boıyń qorǵasyndaı balqyp, tyńdaı bergiń, tipti qaıtadan sábı bolǵyń kele me, qalaı? Kóp turýǵa múmkindik joq edi. Kóktemniń qara sýyǵy óńmenimizden ótip barady. Besigi qansha jyly bolsa da sábı qalaı tońbaı jatyr eken dep tańyrqaǵanbyz. Sýyq aýa ókpesin qaýyp qalmaı ma?
Jamylǵynyń astyna kóz salsaq, kelinshek terbetken besik bos eken. Álgi ájeıdi qaıta shaqyrǵymyz keldi. Salt-dástúr kórsetemiz dep tanaýlap júrgende, qyryn ketip bara jatqan joqpyz ba osy?! Múmkin kóne úrdistiń kósegesin kógertedi dep júrgenderdiń ózin bir ushyqtap alý kerek shyǵar...
Kókshetaý qalasy