Qazynaly qart Qarataýdyń baýraıyndaǵy tarıhı «Tamdy» qalashyǵy talaı jurtty tamsandyrǵan tylsym meken. Qarataý qalasynyń irgesindegi «Tamdy áýlıe» bulaǵy kóneniń kózi, tarıhtyń ózi bolyp búginge jetken. Qasıetti topyraǵynan elge belgili talaı azamat túlep ushqan Talas aýdanynda Tamdy deıtin aýyl taǵy bar. Birligi jarasqan shaǵyn aýylda aıtarlyqtaı jumys atqarylǵan.
Bul kúnde Tamdy aýylynda 1 547 adam turady. 246 úı bar. Aýyl aqsaqaly Seıithan Qoılybaev árdaıym jastardy birlikke, tatýlyqqa shaqyryp keledi. Aýyl azamattary da bir úıdiń balasyndaı birlikte ǵumyr keship otyr.
Tamdy turǵyndary negizinen mal jáne egin sharýashylyǵymen aınalysady. Sondaı-aq bul aýylda 85 sharýa qojalyǵy men 25 jeke kásipkerlik nysany jumys isteıdi. Al aýyldyq okrýg ákimi Raýan Asqarovtyń aıtýynsha, aýyl turǵyndary búginde uıymshyldyqpen tirlik istep, berekesin birlikten taýyp otyr.
«Aýylda áleýmettik az qamtylǵan 31 otbasy bar. Azamattar múmkindiginshe muqtaj jandarǵa kómek kórsetip keledi. Búginde birligimizdiń nátıjesinde aýyl azamattary birigip, kezinde kógildir otynǵa qosyla almaı qalǵan 6 úıge gaz tartý jumysyn júrgizýde. Sonymen qatar bári uıymdasyp «Asarlatyp úı salý» jobasy boıynsha tórt balasy bar bir jas otbasyna úı salyp berdi. Mundaı jumystar aldaǵy ýaqyttarda da jalǵasa beredi», deıdi ol.
Taǵy bir qýanarlyǵy, qazirgi kezde jastar aýylda turaqtap qalyp jatyr. Birqatar azamat Qarataý qalasynyń irgesindegi «TalasInvestKompanı» kompanııasynda jáne «Taraz-Jańatas» baǵytyndaǵy temir jolda jumys isteıdi. Aýylda birde-bir jumyssyz júrgen jas joq.
Tamdy aýylynda gaz, sý máseleleri sheshilgen. Búginde aýyl azamattary týǵan jerge tý tigip, jumys atqarýda. 2016 jyly aýyldan shyqqan kásipker Jumahan Tankebaev aýylǵa jańa meshit salyp beripti. Al 2018 jyly balalar sport alańshasyn paıdalanýǵa bergen. Bul kúnde Seıithan Qoılybaev, Qanat Quralbaev jáne ózge de aýyl aqsaqaldarynyń bastamasymen ishimdik satý múlde toqtatylǵan. Aýylda qazir úsh dúken bolsa, onyń eshqaısysynda da araq-sharap satylmaıdy. Jastar da ıman jolyna bet buryp, ishimdik ataýlyny paıdalanbaıtyn bolǵan. Aldyńǵy býyn aǵalardyń salǵan jolyna túsken aýyl jastary da qazirgi kezde tártip pen tatýlyqty qoldaıdy. Nátıjesinde, aýylda keıingi úsh jylda eshqandaı tártip buzýshylyq tirkelmegen. Qaıta qolda baryn bir-birine bólip berip, berekeli kún keship jatqan aýyl azamattary aldaǵy ýaqytta da talaı ıgi isterdi júzege asyrmaq nıette.
Jambyl oblysy