Qazaqstan men Qyrǵyzstan shekarasynda jalǵan qujattary bar 6 júk kóligi ustaldy, dep habarlaıdy Egemen.kz.
Memlekettik kirister komıtetiniń málimetinshe, 2022 jylǵy 1 sáýirde taýarǵa jalǵan ilespe qujattar bar kólikter anyqtaldy. Olarǵa kıim, aıaq-kıim, kosmetıka, ydys jáne taǵy basqa halyq tutynatyn taýarlar tıelgen.
«Qyrǵyzstannan kele jatqan 6 júk kólik quralyna salyqtyq tekserý júrgizý barysynda qujattarda Qazaqstan alýshysy retinde kórsetilgen kompanııanyń atalǵan taýarlardyń ımportyna eshqandaı qatysy joq ekeni anyqtaldy. Tekseris barysynda kompanııa basshysy ımportqa qatysy joǵy týraly málimdeme jasady», dep jazylǵan habarlamada.
Osyǵan baılanysty bul is boıynsha materıaldar taýarlardy memleket kirisine aınaldyrý úshin sotqa jiberiledi.