Bıylǵy kóktem soltústikke kenetten keldi. Naýryzdyń 30-ynan bastap aýanyń temperatýrasy kúndiz únemi nólden joǵary boldy. Basqa jyldarda bul kórinis 9-10 kúnnen keıin ǵana bolatyn. Jyly kúnniń áserinen qar da tez eridi. Al sońǵy 4-5 kún boıy Petropavlda bir qara daýyl soǵady da turady. 6 sáýirde tún ortasynda sebelep jańbyr jaýǵan, sodan beri qurǵaq. Endi ekpindeı soǵatyn myna qara jel bárin qurǵatyp, onyń ústine órt qaýpin údetip tur.
Jýyrda Zarechnyı kentindegi «Renet», «Vesna» saıajaılarynan ot shyǵyp, keshikpeı ol qurǵaq daýyldyń kúshimen qalyń órtke aınaldy. TJ departamentiniń baspasóz hatshysy E.Jýravlevtiń aıtýyna qaraǵanda, órt «Kıroves», «Stroıtel», «Jemchýjına» degen ıesiz saıajaı ýchaskelerine jaıylyp, 10 gektar jerdi qamtyǵan. Basynda eki órtsóndirgish kólik jiberilgen órt barǵan saıyn jaıylyp, daýyldyń áserimen lapyldap, jalyn aspanǵa kóterilip, búkil qala turǵyndaryna kórindi. О́rt sóndirýshilerge jergilikti bılik ókilderi men bıznes qurylymdary da kómekke keldi. Aqyrynda 12 órtsóndirý tehnıkasy men 70-teı adam kúshi órtti keshki saǵat 21.00-de ǵana aýyzdyqtady. Sonyń ózinde tańǵa deıin byqsyp jatqan jerler boldy. О́rtti tez sóndirýge saıabaq joldarynyń tarlyǵy da kesirin tıgizip baqty. Jypyrlatyp tyǵyz jasalǵan qorshaýlar joldyń bárin taryltyp tastaǵan. Tar joldarda alyp tehnıkalar óte almaı, ótkeni sýy bitken soń aınalyp shyǵa almaı ýaqyt joǵaltty.
Qazir keltirilgen shyǵyn kólemi anyqtalýda. Áıteýir jaralanǵandar men adam shyǵyny joq.
Dál osy kúni «Kopaı» shaǵyn aýdanyndaǵy «Zarına» dıirmeniniń mańyndaǵy qalyń qamystan órt shyqty. Bul jerdegi órtti sóndirýge 2 tehnıka jáne 13 adam kúshi jumyldyryldy. Jalynmen arpalysqan jandar órtti tek túngi saǵat 23.00-de ǵana aýyzdyqtaı aldy. Bir jaqsysy, zardap shekkender men qaza bolǵandar joq.
Petropavl qalasynyń ákimi Bolat Jumabekov órttiń shyǵý sebebi kúnniń daýyl ekendigine qaramaı byltyrǵy qaýdy jaǵýdyń saldary dep otyr. «Keıbir turǵyndar órt qaýipsizdigi sharalaryn saqtamaıdy. Sonyń saldarynan úlken shyǵyndarǵa ushyrap otyrmyz», deı kelip, ol qala turǵyndaryn órt qaýipsizdigin qatań saqtaýǵa shaqyrdy.
Oblystyq TJ departamenti órt baqylaý basqarmasynyń bastyǵy Dmıtrıı Rastıhınniń aıtýyna qaraǵanda, bıyl jyl basynan beri 139 órt sóndirilgen eken. Keltirilgen materıaldyq shyǵynnyń kólemi – 83,6 mln teńge. Sonymen birge 14 adam órtten qaza bolyp, 5 adam aýyr jaralanǵan. Ol da órttiń negizgi sebebi adamdardyń órt qaýipsizdigin saqtamaǵanynan bolatynyn aıtady. «Biz osy aıda ǵana júrgizilgen reıdtiń barysynda órt qaýipsizdigin saqtamaǵan 16 adam anyqtaldy. Olardyń ishinde 6 tulǵaǵa 184 myń teńgeniń aıyppuly salyndy», dedi D.Rastıhın.
Aýa raıyn boljaý qyzmetiniń aıtýyna qaraǵanda, Soltústik Qazaqstan oblysynda aýanyń jylynýy 12-14 gradýsqa deıin kóterilmek. Tipti keı kúnderi 28 gradýsqa deıin ysıdy. Egistiń ylǵaly ushyp ketetin bolǵandyqtan bul dıqan qaýymyn alańdatýda. Alaıda bıylǵy jazda qurǵaqshylyq bolady degen boljam joq, jaýyn-shashyn jyldaǵy normada bolady degen úmit basym.
Soltústik Qazaqstan oblysy