Qyzylordada Á.Marǵulan atyndaǵy Arheologııa ınstıtýtynyń uıymdastyrýymen «Syrdarııanyń tómengi aǵysyndaǵy ejelgi eginshiler» atty dóńgelek ústel ótip, onda osy attas monografııa tanystyryldy.
Bul belgili arheolog J.Qurmanqulovtyń jetekshiligimen 2004 jyldan bastap keshendi túrde júrgizilip kele jatqan Shirik-Rabat arheologııalyq ekspedısııasy eńbeginiń jemisi. Ǵalymdardyń zertteýi Shirik-Rabattyń saq dáýirinde elimizdegi eń úlken eginshilik oazısi bolǵandyǵyn dáleldep otyr.
– Osy mańǵa alǵash zertteý júrgizgen S.P.Tolstov ótken ǵasyrdyń 50-60 jyldardaǵy zertteýler nátıjesine súıenip, Shirik-Rabatty Aral mańy saqtarynyń astanasy dep ataǵanyn bilemiz, al jańa zertteýler onyń iri panteon ekenin, dinı-rýhanı ortalyq bolǵandyǵyn kórsetip otyr. Rabattaǵylar eginshilikpen ǵana shektelip qalmaı, jartylaı kóshpeli mal sharýashylyǵyn da jaqsy ıgergen,– deıdi kitaptyń jaýapty redaktory, arheolog Ázilhan Tájekeev.
Shirik-Rabat kezeńi men keıingi ortaǵasyrlyq dáýirlerde Syr boıyndaǵy dıqandar 2,5 mln gektar jer ıgeripti. Osy mańdaǵy qalalyq mádenıet ortalyǵy Bábish-mola kesheni bolǵan desedi. Bul keshenge Bábish-mola qalashyǵy, ǵıbadathana men qorym, kózeshiler aýyly, eginshilikpen aınalysqan dıqandar mekeni, iri jasandy sýlandyrý qurylystary, magıstraldy kanaldar men egistik alqaptar kiredi.
Solardyń ishindegi erekshesi – kózeshiler aýyly. Mamandar iri qysh kúıdiretin peshter arqyly syrtqy saýdaǵa da buıymdar ázirlengen degen boljam jasaıdy.
Ǵalymdar bul eńbekte keshendi zertteýlerden bólek jaratylystaný ǵylymdarynyń ádisteri keńinen paıdalanylǵanyn aıtady.
QYZYLORDA