14 jastaǵy jasóspirimniń ólimine sebep bolǵan oqıǵa Túrkistan oblysynda oryn alǵan. Aldyn ala boljam boıynsha jasóspirim qutyrma aýrýynan kóz jumǵan, dep habarlaıdy Egemen.kz Sanıtarııalyq - epıdemııalyq baqylaý komıtetine silteme jasap.
Ata-anasynyń sózine súıensek, ótken jyldyń mamyr aıynda ulynyń aıaǵyn ıt qaýyp alǵan. Alaıda ata-ana balany dárigerge kórsetpeı, óz betterinshe úıde emdegen. Arada 1 jylǵa jýyq ýaqyt ótken soń jasóspirimniń boıynan qorqynysh, úreı, dene temperatýrasynyń joǵarylaýy, súıekter men jaraqat alǵan jerdiń aýyrýy, sý ishý kezinde aýanyń jetispeýshiligi jáne jalpy álsizdik sııaqty sımptomdar paıda bola bastaǵan.
Kelesi kúni olar turǵylyqty jeri boıynsha emhanaǵa júgingen, dárigerler oǵan súıek aýrýyna qarsy emdeý taǵaıyndaǵan. Osyǵan qaramastan balanyń jaǵdaıy nasharlaı bergen. Bala bel tusyndaǵy aýrýlarǵa shaǵymdana bastaıdy. Balasyna em-dom izdegen ata-ana jeke klınıkalarǵa ǵana emes, dástúrli emes medısına ókilderine de júgingen. Keıinirek jasóspirimniń búıregi qabynǵany anyqtalyp, soǵan sáıkes em alǵan. Biraq balanyń jaǵdaıy ońalmaǵan. Balada entigý, gıdrofobııa, aerofobııa paıda bolǵan.
«Jaǵdaıy kúrt nasharlaǵan balany 10 sáýirde jedel járdem kóligimen aýdandyq aýrýhanaǵa aparyp, juqpaly aýrýlar bóliminde oǵan qutyrma dıagnozy qoıyldy. Sol kúnnen bastap barlyq otbasy músheleri medısınalyq baqylaýǵa alyndy. Alaıda segizinshi synyp oqýshysyn aman alyp qalý múmkin bolmady. Ol kelesi kúni – 11 sáýirde kóz jumdy», delingen habarlamada.