Grek-rım kúresi sheberleri Ulanbatyrda ótip jatqan Azııa chempıonatyn qorytyndylady. Alǵashqy jarys kúni Serik Jumashev jetekshilik etetin Qazaqstannyń ulttyq quramasy bes júldeni ıelengeni jaıynda biz buǵan deıin habarlaǵanbyz. Kelesi kúni taǵy tórt balýanymyz jeńis tuǵyryna kóterildi. Osylaısha 2 altyn, 5 kúmis jáne 2 qola medaldi oljalaǵan jerlesterimiz jalpykomandalyq esepte aldyna jan salmaı, barsha kúres jankúıerin qýantty.
Sársenbide taǵy bes salmaq dárejesiniń júldeleri sarapqa salyndy. Boz kilemde beldesken órenderimizdiń arasyndaǵy eń tanymaly Meıirjan Shermahanbet ekeni sózsiz. 67 kılo salmaqta synǵa túsip júrgen ol osydan tórt jyl buryn óreli ónerimen kópshilik nazaryn ózine aýdarǵan edi. Atap aıtsaq, 2018 jyly Majarstannyń bas shahary – Býdapeshtte jalaýy jelbiregen álem chempıonatynda 20 jasar jas daryn qola medaldi moınynda jarqyratty. Odan keıin de Shermahanbet talaı baıraqty básekede ulttyq komandamyzdyń namysyn qorǵady.
Mońǵolııanyń astanasynda Meıirjan óziniń myqtylyǵyn túbegeıli moıyndatty. Tusaýkeser kezdesýinde úndistandyq Sahın Sahravatty qamyrsha ılep, taza jeńiske qol jetkizdi – 8:0. Jartylaı fınalda Azııa birinshiliginiń eki dúrkin júldegeri, ózbekstandyq Mahmýd Bahshılloevtan basym tústi – 6:3. Fınalda álem chempıonaty men Azııa oıyndarynda qatarynan eki márte teńdessiz dep tanylyp, qurlyq chempıonatynda úsh ret top jarǵan Rıý Han Sýmen kúsh synasty. Osydan týra úsh jyl buryn Azııa birinshiliginiń aqtyq saıysynda dál osy sańlaq bizdiń Shermahanbetti san soqtyrǵan edi. Al bul joly qazaqtyń uly Ońtústik Koreıadan kelgen dańqty balýannyń tas-talqanyn shyǵaryp, Sıanda jibergen esesin eselep qaıyrdy – 11:3.
72 kılo salmaqtaǵy Abylaıhan Ámzeev pen 82 kılo salmaq-
taǵy Dıas Qalen aqtyq synǵa deıin alqynbaı jetti. Alǵashynda japonııalyq Shogo Takahashı men koreıalyq Lı Jııýndy jeńgen Abylaıhannyń altyn alýǵa tamasha múmkindigi boldy. Sheshýshi tusta qandasymyz Mohammad Reza Mohtarıge qarsy básekede kesek ádis qoldanyp, birden tórt upaı enshiledi. Biraq «ereje buzdy» degen jeleýmen tóreshiler Ámzeevtiń qoldanǵan ádisin esepke almady. Odan keıin Parsy eliniń ókili qatelikke boı aldyrǵan joq. Qajetti upaıdy qorjynǵa salǵan ol jeńis tuǵyrynyń eń bıik satysyna kóterildi.
Bastapqy básekelerin óte qarqyndy bastaǵan Dıas Qalen ózbekstandyq Mýhammadqadyr Rasýlovty 9:1 jáne japonııalyq Iýıa Okadjımany 9:0 esebimen oısyrata utty. Fınalda qazaq jigitiniń joly Rasýl Sadeg Garmsırımen qıysty. Bul tartys bir ǵana upaı aıyrmashylyǵymen Iran ókiliniń paıdasyna sheshildi – 3:4. Jalpy kúmis medaldi moıyndaryna ilgen bul jigitterge esh ókpe joq. Ekeýiniń de ulttyq komandamyzdyń jeıdesin kıgeni keshe ǵana. Soǵan qaramastan, Abylaıhan men Dıas kórermenderdiń kóńilinen shyǵatyndaı óner kórsetti.
60 kılo salmaqtaǵy Ernur Fıdahmetov qola medaldi ıelendi. Jartylaı fınalda ol álem chempıonatynyń eki dúrkin kúmis júldegeri, Álem kýbogynyń ıegeri, qyrǵyzstandyq Jolaman Shershenbekovke ese jiberse, úshinshi oryn úshin tartysta mońǵolııalyq Baljınnııam Seveenravdan aılasyn asyrdy. 97 kılo salmaqtaǵy Sanjar Serikqannyń da qola medal alýǵa múmkindigi boldy. Biraq sheshýshi tusta ol Kúnshyǵys eliniń ókili Takakıro Sýrýdaǵa jol berdi.
Osylaısha, Ulanbatyrda beldesken 10 jerlesimizdiń toǵyzy jeńis tuǵyryna kóterildi. Tarqatyp aıtsaq, 2 altyn, 5 kúmis jáne 2 qolany enshiledik. Kúres túrlerinde komandalyq eseptiń qorytyndysyn shyǵarý júıesi ózgeshe ekeni ózderińizge málim. Bul rette barlyq balýannyń nátıjesi esepke alynyp, jalpy upaı sany shyǵarylady. Bul rette Qazaqstan quramasy barlyq qarsylastarynan qara úzip, komandalyq saıysta aldyna jan salmady. Osy oraıda jarysty basynan aıaǵyna deıin tapjylmaı tamashalap, bizdiń balýandarǵa barynsha demep, qoldaý kórsetken respýblıkalyq Kúres federasııasynyń prezıdenti Dáýlet Turlyhanovtyń eren eńbegin atap ótken jón. Sondaı-aq osy Alashtyń maqtan tutar azamaty biraz jyldan beri Azııa kúres federasııasyn da basqaryp otyrǵanyn da aıta ketken abzal.
Ulanbatyrdaǵy Azııa chempıonatynda nebári jeti memlekettiń grek-rım kúresi sheberleri ǵana jeńis tuǵyryna kóterildi. Olar – Iran (4 altyn+1 kúmis+2 qola), Qyrǵyzstan (3+0+3), Japonııa (1+0+5), О́zbekstan (0+2+3), Ońtústik Koreıa (0+2+1) jáne Úndistan (0+0+4) quramalary.