Mádenı is-shara Qazaqstan men Germanııa arasyndaǵy dıplomatııalyq qarym-qatynastyń 30 jyldyǵyna arnalǵan, dep habarlaıdy Egemen.kz.
Kórermenderge alǵashqylardyń qatarynda rejıssıor Aqan Sataevtyń «Tomırıs» tarıhı kartınasy kórsetildi. Massagetterdiń patshaıymy men parsylardyń Kır patshasy týraly fılmdi tamashalaý kezinde zal kisige lyq toldy. Kórsetilim nemis astanasyndaǵy eń ataqty kınoteatrlardyń biri Zoo Palast-ta ótti.
Kórermenderdiń aıtýynsha, akterlardyń oıyny men kostıýmderi erekshe áser qaldyrǵan.
Osy aptalyq aıasynda rejıssıor Nurgeldi Sadyǵulovtyń «Balýan Sholaq», Rashıd Súleımenovtiń «Oralý» fılmderi, al kishkentaı kórermender úshin rejıssıorler Tilek Tóleýǵazy men Turdybek Maıdannyń «Muzbalaq» mýltfılmi kórsetiledi.
«Men jańa ǵana fılmdi kórip shyqtym, kartınadan keremet áser aldym. Ásirese maıdan dalasyndaǵy kórinister kóńilimnen shyqty, olardy túsirý, kaskaderlardyń jumysyn jalpy búkil úderisti uıymdastyrý óte qıyn. Bul keremet is jáne tarıhqa tereń boılaýǵa tamasha múmkindik. Erik-jigeri myqty áıeldiń beınesi sátti berilgen. Sosyn árıne kostıýmder óte qatty unady», dedi fılm prodıýseri Tereza Klamann.
«Osy is-sharanyń aıasynda biz úsh kórkem fılm, bir derekti fılm jáne bir balalarǵa arnalǵan mýltfılmdi kórsetýdi josparlap otyrmyz. Árıne, eki el qarym-qatynasyndaǵy erekshe bir sala – mádenı dıplomatııa. Biz elimizdiń salt-dástúrin, mádenıetin kıno arqyly jergilikti jurtshylyqqa jetkizeıik degen maqsatymyz. Bul elshiliktiń jeke josparlaǵan is-sharalarynyń biri bolyp tabylady. Qarym-qatynastyń 30 jyldyǵy bolǵandyqtan, árıne, biz osy mereıli jyl aıasynda kóptegen is-sharalardy júzege asyrýǵa josparlap otyrmyz», dedi GFR-daǵy QR elshisi Dáýren Karıpov.
Aıana Toǵanbek