Mańǵystaýda jańa jýrnaldyń tusaýy kesildi. Ataýy – «Sherqala». Qazaq dalasynyń geografııasy men tarıhynan habary bar jan estimeı qalýy múmkin emes Mańǵystaýdaǵy kádimgi Sherqala taýy. Mádenı-tarıhı, ádebı-kórkemdik jýrnaldyń baǵdarshamy, ıaǵnı aıtpaǵy – halqymyzdyń salt-dástúrin nasıhattaý, aǵa býynnyń ónegeli jolyn jas urpaqqa úlgi etý, tarıhty tiriltip, rýhanı turǵyda jastar tárbıesine atsalysý, Táýelsizdik tuǵyryn nyǵaıtýǵa aqparattyq turǵyda úles qosý.
Tusaýkeser saltanatyna qatysqan aımaq basshysy A.Aıdarbaev jýrnaldyń Elbasy N.Nazarbaevtyń «Mádenı mura» baǵdarlamasynyń óńirlik jobasy aıasynda jasalynǵan jaqsy dúnıelerdiń biri ekenin aıtyp, basylym bolashaǵyna sáttilik tiledi.
Jańa jýrnaldyń arqalaıtyn júgi, atqaratyn qyzmeti, aıtatyn sózi, aldaǵy jospary týraly baıandaǵan «Mańǵystaý-medıa» JShS dırektory Ǵ.Meldesh jýrnaldyń jaryq kórýine qoldaý kórsetken oblys basshylyǵyna oqyrmandar atynan rızashylyǵyn bildirdi. Qýanarlyǵy – «Sherqala» jýrnaly endi sizdi «Eır-Astana» ushaǵy borttarynda da qarsy almaq.
Osyny túsingen jańa jýrnaldyń bas redaktory Mańdaıly Qosymbaı senim údesinen shyǵýǵa tyrysatyndyǵyn, jýrnalıstıka salasynda jıǵan is-tájirıbesin aıanbaı jumsaıtyndyǵyn jetkizdi. Elimizdiń bas gazeti, halqymyzdyń nebir marqasqa azamattary eńbek etken, talaı jas qanattyń topshysyn qataıtyp, tomaǵasyn sypyrǵan «Egemen Qazaqstannyń» mektebinen ótken, jergilikti «Mańǵystaý» gazetin 11 jyl basqaryp ysylǵan, respýblıkaǵa tanymal jýrnalıstiń qolynda endi jańa jýrnal tizgini men taǵdyry. Oqyrmannyń izdegeni tabylyp, rýhanı shólin basatyn, janyn sýsatatyn jýrnaly bolǵaı!
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.