Tbılısıde Abaı Qunanbaıulynyń eskertkishiniń ashylý saltanaty ótti. Is-sharaǵa Indýstrııa jáne ınfraqurylymdyq damý mınıstri Qaıyrbek О́skenbaev qatysty, dep habarlaıdy Egemen.kz.
Tbılısıge jumys saparymen kelgen QR Indýstrııa jáne ınfraqurylymdyq damý mınıstri Qaıyrbek О́skenbaev Grýzııanyń vıse-premeri, ekonomıka jáne turaqty damý mınıstri Levan Davıtashvılımen kezdesti.
Kelissózder barysynda kólik, aqparattyq tehnologııalar jáne ınnovasııalar salasyndaǵy saýda-ekonomıkalyq yntymaqtastyqty damytý perspektıvalary sııaqty mańyzdy máseleler qozǵaldy. Q.О́skenbaevtyń aıtýynsha, Qazaqstan men Grýzııa arasyndaǵy saýda qatynastaryn ulǵaıtýda aıtarlyqtaı áleýet baıqalady. Mınıstr búgingi tańda qazaqstandyq kompanııalar metallýrgııa, munaı-hımııa, tamaq jáne mashına jasaý salalarynda óńdelgen taýarlarynyń Grýzııaǵa eksportyn arttyrýǵa daıyn ekenin atap ótti. Olardyń qatarynda farmasevtıka men qurylys salasy da bar.
«Saýda-ekonomıkalyq yntymaqtastyq jónindegi úkimetaralyq komıssııa áriptestikti damytý barysynda mańyzdy ról atqarady. Osy rette eki el arasyndaǵy ózara is-qımyldyń damý qarqynyn atap ótkim keledi. Búginde elimizde Grýzııanyń qatysýymen 248 birlesken kásiporyn jumys isteıdi. Qazaqstan men Grýzııa arasyndaǵy syrtqy saýda aınalymy da oń dınamıka kórsetip otyr», dedi mınıstr.
Transkaspıı halyqaralyq kólik baǵdaryn damytý sheńberinde Qazaqstan Grýzııamen belsendi yntymaqtastyq ornatqanyn atap ótken jón.
IIDM basshysy sondaı-aq «Delta» memlekettik áskerı ǵylymı-tehnıkalyq ortalyǵyna jáne «TAM» Tbılısı avıasııalyq zaýytyna baryp, kásiporynnyń jumysymen tanysty, keıin «Potı» jáne «Batýmı» porttarynyń basshylarymen kezdesti.
Sonymen birge jumys sapary aıasynda Abaı Qunanbaıulynyń eskertkishiniń ashylý saltanatyna qatysty. Atalǵan is-shara Qazaqstan men Grýzııa arasyndaǵy dıplomatııalyq qarym-qatynastardyń ornaǵanyna 30 jyl tolýyna oraı uıymdastyryldy.
«Bul eki el arasyndaǵy dostyǵymyzdyń taǵy bir nyshany bolary sózsiz. Abaı murasy tek bizdiń elimiz úshin ǵana emes, búkil adamzat úshin úlken qundylyq. 2020 jyly biz Uly Abaıdyń 175 jyldyq mereıtoıyn atap óttik. Kórsetilgen osynaý qurmet úshin Grýzııa Úkimeti men halqyna alǵys aıtamyn», dep atap ótti Qaıyrbek О́skenbaev.
Sapardyń ekinshi kúni mınıstr Grýzııanyń Qorǵanys mınıstri Býrchýladze Djýanshermen kezdesip, saýda-ekonomıkalyq yntymaqtastyq jónindegi úkimetaralyq komıssııa otyrysynyń jumysyna qatysýdy josparlap otyr. Otyrys qorytyndysy boıynsha birqatar qujattarǵa qol qoıylady dep kútilýde.