Birneshe jyldan beri ınternet keńistikte bolyp jatqan aqparattyq soǵysty nazardan tys qaldyrý múmkin emes. Búgingi tańda áleýmettik jelilerde abaısyzda aıtylǵan sóz eleýli qaqtyǵystarǵa ákelýi yqtımal, tipti eldegi jaǵdaıdy turaqsyzdandyrýy múmkin. Adamdar ózimizdiki jáne bóten dep bólise bastaıdy. Áleýmettik medıada arandatýshylar kóp. Feık-nıýs degen de bar. Ony qurtý kerek edi.
Jańarǵan Qazaqstan – jańa aqparattyq saıasat, ol bir ýaqytta sóz bostandyǵyna quqyq berip, árbir jarııa sóz úshin jaýap berýge mindetteýge tıis. Áıtpese, jyldar boıy jınaǵan barlyq qundylyǵymyzdan aıyrylyp, «aqparattyq haosta» qalyp qoıýymyz múmkin. Biz buqaralyq aqparat quraldarynyń, ásirese synı jaǵdaılarda, qandaı kúshke ıe ekenin bilemiz. Qańtar oqıǵalary kezinde biz muny tolyq sezdik. Áli kúnge deıin túrli aqparat taratylyp jatyr. Meniń oıymsha, olardy qadaǵalap, jazalaý kerek! Áriptes jýrnalısterge aıtarym, biz sizdermen birge el tarıhyn jazyp jatyrmyz. Jaı tanymaldylyqpen haıp qýyp, qoǵamdy aldamaýymyz kerek. Aqyr sońynda, qarapaıym jýrnalıstik Etıka, Ar-namys kodeksiniń baryn esten shyǵarmaýymyz kerek. Búginde geosaıası daǵdarys jaǵdaıynda bul jaýapkershilik eselep artýda. Biz taraptardyń eshqaısysyn qoldamaımyz jáne kez kelgen zorlyq-zombylyqqa qarsymyz. Biz úshin óz elimizde beıbitshilik pen birlikti saqtaý áldeqaıda mańyzdyraq. Zeıinimizdi óz múddelerimizge shoǵyrlandyramyz. Bul taqyrypty bile tura órshitip otyrǵandar óte radıkaldy málimdemelerge jol beredi, olardy qatań túrde toqtatý kerek. Muny kim aıtqany mańyzdy emes: jýrnalıst pe, qoǵam qaıratkeri me, saıasatker me, álde qarapaıym azamat pa? Etnostyq tegine de qaramastan. Memleket bul turǵyda naqty áreket etýge tıis.
Prezıdenttiń nusqaýlaryna sáıkes Assambleıa músheleri men qoǵamdyq qurylymdary únsiz qalmaıdy jáne elimizdegi birlik pen beıbitshilikke qarsy aıtylǵan birde-bir sózdi jaýapsyz qaldyrmaıdy. Máselen, Reseı-Ýkraına qaqtyǵysyna baılanysty qazaqstandyqtar arasynda arandatýshylyq pen alaýyzdyq týdyrý áreketterine qatysty birqatar respýblıkalyq etnomádenı birlestiktiń kóshbasshylary tıisti birlesken málimdeme jasady.
Orys etnosynyń ókili retinde osy múmkindikti paıdalana otyryp, elimizdiń orys azamattaryna aıtarym, bizdiń árqaısymyz óz Otanymyz qaıda ekenin naqty túsinýimiz kerek. Men úshin Qazaqstan – týǵan el. Men osynda týdym, ákem men ájem dúnıege keldi, maǵan eshkim eshqashan ultyma qarap qysym kórsetken joq. Meniń óz tilimde sóıleýge, tabysty jumys isteýge múmkindigim bar. Balalarym orys mektebinde oqıdy. Sondyqtan buǵan rızashylyqpen qaraýymyz kerek. Bárimiz birge bolýymyz kerek. Qazaqstan ishindegi beıbitshilikti saqtaıyq. Bul – kez kelgen shabýylǵa qarsy turý.
Nadejda PALINKA,
jýrnalıst