Qala qazaǵy bir ǵasyr boıy jyrlap kele jatqan bir jyr bolsa, ol – baspana jyry. Baspananyń joqtyǵy, ásirese, bala-shaǵanyń kóbeıgen kezinde qatty bilinedi. Páterge almaıdy, alsa da «shýlaǵan bala-shaǵań tynyshtyq bermeıtini óz aldyna, qabyrǵany, edendi búldirdi» dep álek salady. Turmystyń juqalyǵy men pana bolar otaýdyń joqtyǵyn Baqbergen Meıirmanovtyń otbasy da bala-shaǵasy kóbeıgen soń shyndap túsindi, áleýmettik joqshylyqtyń saldary nege soqtyratynyn kózimen kórdi. Mektepte oqıtyn Nurdáýlet pen Nursultannyń, odan eki jasqa endi aıaq basqan Álııanyń sońyn ala Márııa, Ǵalııa, Darııa esimdi úshemderdiń týylýy bir jaǵynan otyzdyń jýan ortasyndaǵy ákeni qýantqanymen, ekinshi jaǵynan boıyn «apyr-aı, endi qaıttim» deıtin úreı bıledi. Bul otbasy alty bala – Allanyń syıy dep júrgende, bıyl taǵy bir perzent dúnıege keldi. Sánııa!
Ras, Baqbergenniń otbasynda úshemder dúnıege kelgende BAQ-tyń nazary aýyp, bul otbasy týraly teledıdardan da kórsetip, saıttar da jazyp jatty. Ondaǵy negizgi maqsat – úshem týylǵan otbasynyń áleýmettik jaǵdaıyn tıisti mekemelerge jetkizý, qaltasy qalyń azamattarǵa qulaqqaǵys jasaý edi. Muny estigen elordadaǵy Qazaq Memlekettik Zań ýnıversıtetiniń basshylyǵy byltyr Baqbergen Meıirmanovty izdep taýyp, ýnıversıtettiń jataqhanasynda eki aı panalatqan bolsa, odan keıin Astananyń irgesindegi Qosshy eldi mekenine qaraıtyn «Lesnaıa polıana» alabynan úsh bólmeli páterdi jaldaýyna kómektesken. «Bizdiń «Lesnaıa polıanada» turyp jatqanymyzǵa alty aı boldy. Páteraqyny da, kommýnaldyq qyzmetti de Qazaq Memlekettik Zań ýnıversıtetiniń basshylyǵy tólep otyr. Kıimderimizdi de osy kisiler áperýde. Balalarǵa tólenetin járdemaqy arqyly tamaǵymyzdy ajyratamyz. Men Talǵat Nárikbaev bastaǵan bul kisilerge alǵys aıtamyn. Eshqandaı týysym da, tanysym da emes, ózderi meni izdep taýyp kómektesti. Onyń aldynda bizdiń jaǵdaıymyz óte tómen edi. Múmkin áleýmettik ahýalymyz sál durystaý bolǵanda, balalarymnyń biri aýrý bop týylmas pa edi?», deıdi Baqbergen. Kezinde qurylys salasynda da, kúzetshilikte de jumys istep, otbasyn asyrap júrgen jigit qazir ekige kelmeı jatyp eki ret ota jasatqan aýrý balasynyń jaǵdaıyna baılanysty úıinde otyr. Sebebi túsinikti de... Baqbergen árbir oblystarda, qalalarda ómirge kep jatqan úshemderge túrli joldarmen úı beriletinin, ózderine de sondaı múmkindik jasalsa deıtin nıeti bar ekenin aıtady. Árıne, «basqa úshemderge beriledi, nege biz eskerilmeımiz», deıtin salystyrmaly pikir ǵoı. Áıtpese, «úshem týylǵan otbasyǵa sózsiz páter berilýi kerek» deıtin ne zań, ne qaýly joq ekeni belgili. Bul jerde áńgime tek adamdardyń meıirimi, shyn máninde jany ashýy týraly ǵana. Jany ashyǵan QazMZÝ basshylyǵy ázirge qanatynyń astyna alyp otyr. Biraq, Meıirmanovtar jeti balamen jaldamaly páterde qashanǵa deıin jáýdirep otyrmaq? Astana qalalyq Turǵyn úı basqarmasyndaǵy kezegi de ázirge jyldam jyljıtyn túri joq. №10563-shi kezektiń qaı jyly keletinin de dál boljaý qıyn. Sol úshin áli de bolsa Meıirmanovtar otbasyna meıirimin tógetin, basy bútin páterli bolýyna járdemdesetin Atymtaı jomarttardy izdeımiz. El ishinde «Oń qolyńnyń bergenin sol qolyń kórmesin» deıtin ımandy ári jomart azamattardyń bar ekenine sengimiz keledi.
Aıgúl SEIILOVA,
«Egemen Qazaqstan».