Almatyda “Ahmet Jubanov atyndaǵy qor” qoǵamdyq qory alǵash ret uıymdastyrǵan “Qazaqstan kompozıtorlary – balalarǵa” atty mýzykalyq festıval tusaýyn kesti.
Qazaq kompozıtorlarynyń shyǵarmalaryn, klassıkalyq mýzyka jaýharlaryn qulaq quryshyńdy qandyryp, náshine keltirip, minsiz oryndaıtyn búldirshin býynnyń ósip kele jatqanyn pash etken bul festıvaldi Ahmet Jubanovtyń nemeresi Sholpan Jubanova tolqyp turyp, bastap berdi. Talanttyń tuıaǵy bul shara mádenı muralarymyzdy sandyq jaǵynan da, sapalyq jaǵynan da ulyqtap ótetindigine senim bildirgen.
Aıtsa aıtqandaı, eki bólimnen turatyn konsert mýzykanyń móldir álemine tartyp áketti. Kompozıtorlardyń fortepıanoǵa arnalǵan shyǵarmalaryna arnalǵan alǵashqy bólimdi №5 mýzykalyq balalar mektebiniń 2-synyp oqýshysy Iýrıı Trofımov bastap berdi. Kip-kishkentaı Iýranyń oryndaýynda fortepıanodan kompozıtor M.Erjanovtyń tamasha týyndysy tógilip jatyr. Tıtimdeı názik saýsaqtar kóz ilespes qımylmen qandaı sulý notalardy syńǵyr-syńǵyr tóge alady deseńshi.
Dál osyndaı leppen esken Abaıdyń “Kózimniń qarasyn” Jánııa Áýbákirovanyń avtorlyq mektebiniń oqýshysy Venera Atasheva oryndady. San túrli mýzykalyq baıqaýlardyń júldeli oryndaryn talassyz jeńip alyp júrgen №83 óner gımnazııasynyń 8-synyp oqýshysy Aleksandr Ýstınovtyń oryndaýshylyq sheberligimen qaýyshý da bir ǵanıbet. Onyń oryndaýyndaǵy K.Dúısekeevtiń “Nar jaılaýyn” kásipqoı mýzyka mamandarynyń ózi uıyp tyńdap, minsiz shalyqtaǵan shyǵarmaǵa rııasyz qoshemet bildirdi.
Qazaq kompozıtorlarynyń eń tańdaýly, eń kúrdeli shyǵarmalaryn fortepıanodan tógildirgen A.Jubanov atyndaǵy Respýblıkalyq mamandandyrylǵan mýzykalyq orta mektep-ınternatynyń oqýshysy Quralaı Sátbaeva, P.Chaıkovskıı atyndaǵy mýzykalyq kolledjiniń oqýshylary – Oljas Báıdildaev, Marııa Ismaılova, Ánel Toıshybekova, №5 mýzykalyq balalar mektebiniń oqýshylary Dmıtrıı Zabrovskıı men Názigúl Arystanbekova, №83 óner gımnazııasynyń oqýshysy Dıana О́mirzaq, K.Baıseıitova atyndaǵy Respýblıkalyq mamandandyrylǵan mektep-ınternatynyń oqýshysy Daler Myrzaǵalıevtar týraly jeke-dara aıtyp, keleshekterine qanat bitirýge bolady.
Az-kem úziliste, kórermender arasynda otyrǵan talantty dırıjer Alan Bóribaevty kózimiz shalyp, álemniń áıgili sahnalarynda ultymyzdyń atyn shyǵaryp júrgen jerlesimizden syr tartyp, balalardyń oryndaýshylyq qabiletine búkpesiz, boıamasyz baǵa berýin suraǵan edik.
– Tamasha ıdeıa. Men, rasynda, demalyp otyrmyn. Alǵash ret qazaqstandyq kompozıtorlardy jańa býynnyń oryndaýynda tyńdadym. Tipti oryndaýshylardyń keıbiri mekteptiń bastaýysh synyptarynda ǵana oqıdy, biraq, talaptary taýdaı. Ulttyq mádenı muralarymyzdy balalardyń boıyna týǵanynan darytý bastamasy – tabylǵan aqyl. Men muny eljandylyq aksııa dep bilemin. Balalar qandaı qabiletti, shetterinen súıkimdi, eńbekqor. Týǵan eliniń mýzykasyn súıgen, qadirlegen, qasterlegen adamnan erteń sózsiz jaqsy adam shyǵady, – dedi ol.
– Konsert kópshilikke unap otyr. Balalardyń ata-analary da asa tolqýly. Degenmen, siz kásipqoı mýzykantsyz ǵoı. Balalardyń oryndaýshylyq deńgeıi qalaı? – deımiz taǵy da.
– О́te jaqsy. О́zime unady. Mundaı festıvalderdi jıi ótkizý kerek. Sonda búldirshinderdiń basqa zamandastary da klassıkalyq ónerge kele bastaıdy. Elikteıdi. Menińshe, balalar oryndaý barysynda munan da erkindeý bolsa. Biraq, ol ýaqytpen keletin dúnıe. Eń bastysy, daryndardyń jáne myqty mýzykalyq mekteptiń bar ekendigine óz basym kýá bolyp otyrmyn, – deıdi Alan Bóribaev.
Festıvaldiń ekinshi bóligin A.Jubanov atyndaǵy Respýblıkalyq mamandandyrylǵan mýzykalyq orta mektep-ınternattyń tromboshylar kvarteti ashty. Ile-shala Jambyl atyndaǵy fılarmonııanyń kameralyq zalyn №1 mýzyka mektebiniń balalar hory E.Brýsılovskııdiń “Sholpan” shyǵarmasymen áldıledi.
Jaqsynyń jalǵasty bolǵanyn, ulylardan tuıaq qalǵanyn tilegen halyqpyz ǵoı. “Qozy Kórpesh – Baıan sulý” baletinen solo oryndap turǵan óndirdeı jetkinshek Ahmet Jubanovtyń shóberesi edi. Alystan talyp jetken skrıpka sazy adamdy arbaı-arbaı, sanany sıqyrlap jaqyndap keledi. Sát saıyn sulýlanyp, ózine tarta bastady. Dál qulaǵyńnyń túbine jetip, degbirińdi qashyryp, demińdi tartqyzǵan áýen sap tyıylǵanda, tyńdarman dúr ete tústi. Árıne, bul qanynda bar qabiletpen kópshilikti tánti etken Jiger Jubanov bolatyn.
Teginde bar talantpen tyńdarmandy tánti etken darynnyń biri Elmar Bóribaev boldy. Elmar da Ahmet Jubanovtyń jıen nemeresi. 15 jastaǵy Elmar K.Baıseıitova atyndaǵy mýzykalyq mektep-ınternatta oqıdy.
Sol sııaqty A.Jubanovtyń “Arııasyn” fortepıano men skrıpkada oryndaǵan Aıdana men Gúldana Danııalovalar, S.Kıbırovanyń “Skersınosyn” oryndaǵan Ásem Núsipova, L.Hamıdıdiń “Qazaq valsin” blok-fleıtada syrnaılatqan Dastan Shápıev, A.Zataevıchtiń “Qazaq bıin” skrıpkada oryndaǵan Shyńǵys Belgibaev syndy daryndy balalar til-kózden aman bolsa áli de attary estilip, juldyzdary jarqyraı bermek.
Festıval da aıaqtalyp keledi. №1 mýzykalyq balalar mektebiniń skrıpkashylar ansambli qazaq kompozıtorlarynyń shyǵarmalarynan poppýrı oryndap, tuńǵysh festıvaldi márege jetkizdi.
Osy festıvalge sheneýnik retinde emes, ónerdiń bel balasy retinde kelgen Mádenıet mınıstriniń orynbasary Asqar Bóribaev sóz alyp, ortaǵa shyqqan.
– Men tipti sóıleımin dep oılamap edim. Biraq, qýanyshym arnasynan asyp tur. Kompozıtorlardyń shyǵarmalaryn balalar qandaı ǵajap oryndap shyqty. Klassıkalyq ónerdiń keleshegi kemel ekendigin kórdik. Bul jerde eshqandaı fonogramma da, mıkrofon da joq. Mýzykant pen mýzyka quraly ǵana bar. Balalardyń ábden daıyndalǵanyn, qajyrly jumys istegenin kórdik. Klassıkalyq mýzyka óte úlken tózimdi qajet etedi. Kún saıyn daıyndalý kerek, kún saıyn onymen aınalysý qajet. Sonda ǵana búgingi nátıjege qol jetkizýge bolady, – dedi vıse-mınıstr.
“Ahmet Jubanov atyndaǵy qor” qoǵamdyq qory uıymdastyrǵan alǵashqy festıvaldiń árbir qatysýshysy arnaıy dıplommen, estelik syılyqtarmen marapattaldy. Jeńgen de, jeńilgen de jetkinshek bolǵan joq. О́ner óz bıiginde qaldy.
Aınash ESALI, Sýretterdi túsirgen Bersinbek SÁRSENOV, ALMATY.