Elordadaǵy «Astana» konsert zalynda Nur-Sultan qalasy ákimdiginiń qoldaýymen belgili aqyn, Qazaqstannyń mádenıet qaıratkeri Marfýǵa Bektemirovany eske alýǵa arnalǵan «Aqqýym meniń, qaıdasyń?» atty ádebı mýzykalyq kesh ótti.
Aldymen keshke jınalǵan qaýymǵa Parlament Senatynyń tóraǵasy Máýlen Áshimbaevtyń talantty aqyn shyǵarmashylyǵy týraly jyly iltıpatyn bildirgen hatyn Senat Spıkeriniń keńesshisi, jýrnalıst Bıbigúl Jeksenbaı oqyp berdi.
– Qazaq – qashanda aqynǵa qurmet kórsetken, qalamgerdi qadir tutqan halyq. Ulttyq poezııanyń kórnekti ókili, qazaqtyń aqqý júrek aqyny Marfýǵa Bektemirovany eske alýǵa arnalǵan búgingi is-shara – sonyń jarqyn kórinisi. Marfýǵa Bektemirova – búkil ǵumyryn shyǵarmashylyqqa arnaǵan, ádebıetimizde óziniń dara izin qaldyrǵan qalamger. Onyń ár jolynan náziktik pen sezimniń lebi esip turatyn óleńderi oqyrman qaýymdy qashanda erekshe áserge bóleıdi. Marfýǵa apamyzdyń tárjima salasyndaǵy eńbekteri de óz aldyna bir tóbe. Jýrnalıstıkada jaýapty qyzmet atqaryp, bul baǵytta da ózindik qoltańbasymen tanyldy. Aqynnyń sońynda qalǵan mol murasyn nasıhattaý qashanda mańyzdy. Sondyqtan Marfýǵa Bektemirovanyń esimi men shyǵarmashylyǵyn dáripteýge arnalǵan búgingideı keshterdiń óskeleń urpaqqa bereri mol, – delingen Senat Tóraǵasynyń hatynda.
Odan keıin sóz alǵan qalamger, Ulttyq ǵylym akademııasynyń akademıgi Ýálıhan Qalıjan, belgili satırık, halyqaralyq «Alash» ádebı syılyǵynyń laýreaty Kópen Ámirbek aıtýly aqyn týraly taǵylymdy estelikterimen bólisse, L.N.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýlteti dekanynyń orynbasary Gúljaýhar Bolatova osydan eki jyl buryn atalǵan fakýltettiń bir túlegi fılologııa ǵylymdarynyń doktory, professor Sáýle Tapanovanyń jetekshiligimen «Marfýǵa Bektemirova − redaktor, jýrnalıst, pýblısıst» degen taqyrypta dıplom jumysyn qorǵap, joǵary baǵa alǵandyǵyn sóz etti.
Ádebı-sazdy kesh barysynda astanalyq fılarmonııa ánshileri Dıana Maı, Aqbota Qusnadın, Ákimhan Májenov, Saltanat Serkebaeva aqynnyń sózine jazylǵan birqatar ándi oryndap, tyńdarmandaryn ádemi sezimge bóledi. Sondaı-aq Mýzykalyq jas kórermen teatrynyń ártisteri de syrshyl shaıyrdyń óleńderin oqyp, teatrlandyrylǵan qoıylym qoıdy. Al keshti Marfýǵa Bektemirovanyń jary, qalamger Esengeldi Súıinov qorytyndylap, jınalǵan jurtshylyqqa rızashylyǵyn bildirdi.