Ulttyq testileý ortalyǵynyń dırektory Rýslan Emelbaev UBT kezindegi zańbuzýshylyqtar jóninde aıtyp berdi, dep habarlaıdy Egemen.kz.
«Shyny kerek, testileýdi ońaı tapsyrý úshin keıbir test tapsyrýshylar ártúrli qýlyqtarǵa barýǵa daıyn. Biraq bizdiń júıeni eshkim aldaı almaıdy. Naýryz aıynda ótken UBT-da testileý kezinde erejelerdi buzǵany úshin aýdıtorııadan barlyǵy 259 adam shyǵarylyp, olardyń nátıjesi joıyldy. Onyń ishinde 9 testilenýshi test suraqtaryn sýretke túsirip, olardy telegram arnalarǵa taratqan. Bul máseleni 2 aı boıy tolyǵymen zerttep, qyzmettik tekseris júrgizdik. Sebebi suraq kóp. Mysaly, test tapsyrmalary qalaı tarady? Kameralar nege eshnárse túsirmegen? Baqylaýshylar qaıda qaraǵan? Ishki tekseristiń nátıjesinde 9 test tapsyrýshynyń nátıjesi joıylyp, 3 qyzmetshi jumystan bosatyldy. Is quzyretti organdarǵa jiberildi», dep jazdy ortalyq dırektory Instagram paraqshasynda.
Onyń aıtýynsha, WhatsApp nómirin ashyq jarııalaǵannan beri halyqpen tyǵyz baılanys ornatqan. Keıbir ereje buzý týraly aqparatty test tapsyrýshylardyń ózderi habarlap otyrady.
«Olardyń akademııalyq adaldyqtyń saqtalýyn qoldaıtyny qýantady. Bul jaǵdaı endi qaıtalanbaıdy dep senemiz. Endi ár qatysýshynyń jeke test nusqasy bolady. Sondaı-aq eger test tapsyrýshy birinshi múmkindiginde tyıym salynǵan zatpen kirýge talpynsa nemese testileýde ustalatyn bolsa, onda ol ekinshi múmkindigin qoldana almaıdy. Al dál osy jaǵdaı ekinshi múmkindikte oryn alsa, onda birinshi múmkindiginiń nátıjeleri joıylyp, grant konkýrsyna qatysa almaıdy. Iаǵnı, eki múmkindikti paıdalanýdyń da óziniń erejeleri bar. Negizgi UBT-nyń aldynda testileýdi tapsyrýǵa kómektesemiz degen alaıaqtar kóbeıip ketetini bárimizge málim. Alaıaqtarǵa senbeńizder, bizdiń júıeni aldaý múmkin emestigin taǵy bir eskertemin. Túlekterdiń ereje buzýshylardyń is-áreketin qaıtalamaýǵa shaqyramyn. Táýekelge barmaı, testileýdi ádil tapsyrýǵa keńes beremin», dep túıindedi sózin Rýslan Emelbaev.