Elordadaǵy Ulttyq mýzeıde Qazaqstan Sýretshiler odaǵynyń múshesi, daryndy qylqalam sheberi Botagóz Tóleshtiń «Jańarý» atty jeke kórmesi ashyldy.
Mazmundy sharanyń ashylýynda Parlament Májilisiniń depýtaty Darhan Myńbaı sýretshi shyǵarmashylyǵy týraly salmaqty oı qozǵap, kórmege qoıylǵan kestesi kórkem, órnegi ásem kartınalar kórermendi beı-jaı qaldyrmaıdy dese, Ulttyq mýzeıdiń ǵylymı hatshysy Saıalbek Gızzatov is-sharanyń negizgi maqsatyna toqtalyp, qoǵamdaǵy názik jandylardy alańdatqan san alýan ózekti máselelerdi qylqalam ıesi óz týyndylarynda emeýrinmen sheber jetkize bilgendigin sóz etti. Sondaı-aq belgili sýretshi Sembiǵalı Smaǵulov ta talantty áriptesiniń beıneleý ónerinde eshkimge uqsamaıtyn qoltańbasy bar ekendigin jetkizdi.
Jalpy, sýretshi taqyryby tosyn, ýaqyt aralyǵyndaǵy keńistik, qımyl-qozǵalys, sheksiz qazaq dalasy, qustardyń ushýy, áýen úni, qyzdardyń armany sekildi bolyp keledi. Sondyqtan da, onyń kartınalaryndaǵy beıneler, boıaý túsi, aıtar oıy – bári de fılosofııalyq astarmen berilgen. Sýretshi sizge birden syryn ashpaıdy, jabyq qulyp sekildi, ony túsiný úshin kiltin izdeısiz.
Botagóz – ónerli otbasynan shyqqan, ákesi Shoqan Tólesh – tanymal músinshi. Alaıda ol sándik-qoldanbaly ónerdiń gobelen sekildi kúrdeli túrin qýyp, óz órnegin tapqan. Búginge deıin onyń kórmeleri elimizden bólek, Túrkııa, Bolgarııa, Polshada uıymdastyrylǵan. Birqatar jumystary Qazaqstan, Ulybrıtanııa, AQSh jáne Italııanyń jeke kolleksııalarynda saqtaýly tur.
Is-shara sońynda kórme ıesine Qazaqstan Sýretshiler odaǵy atynan beıneleý ónerine qosqan eńbegi úshin Alǵys hat tabys etildi.