«Qymyzmuryndyq» – atadan balaǵa mıras bolyp kele jatqan ıgi dástúrdiń biri. Bul ejelden qalyptasqan jazǵa qaraı bıe baılap, alǵashqy qymyz ishý rásimi. Oǵan aýyl aqsaqaldary men ózge de syıly qonaqtar shaqyrylady. Kópshilikke arnap aq dastarqan jaıylyp, bata jasalady. Dástúrge saı, bıyl bul úrdis Áýlıeata óńirinde óz jalǵasyn tapty. Talas aýdanynyń «Juryndysaı» balalar lagerinde oblystyq «Qymyzmuryndyq-2022» etno-festıvali ótti. Atalǵan is-sharaǵa Jambyl oblysynyń ákimi Nurjan Nurjigitov qatysty. Sondaı-aq etno-festıvalge Taraz qalasy men óńir aýdandarynan júzge jýyq ardager shaqyrylǵan.
Qart Qarataýdyń bókterinde ótken ıgi is-shara barysynda kelýshilerdi aq jaýlyqty ájeler qazaqy qonaqjaılyq peıilmen shashý shashyp qarsy aldy. Qymyz ázirleýshiler qymyz baptaý barysyndaǵy tájirıbelerimen bólisti. Al qonaqtar ystyq baýyrsaq pen qymyzdan dám tatty. Sonymen qatar ardagerler «Aýyz tııý», «Bıebaılar» rásimderine qatysyp, arnaıy uıymdastyrylǵan túrli salt-dástúrler men sporttyq jarystardy, qolóner kórmelerin tamashalady. Qarııalar kópshilikke aq batasyn berip, eldiń tynyshtyǵy men amandyǵyn tiledi. Atalǵan is-shara barysynda talastyq ónerpazdar óner kórsetti. Qarataý aspanyn án kernep, kúı qalyqtady. Jıynda halyqaralyq Qazaqstan Dauiri jaýapkershiligi shekteýli seriktestiginiń bas dırektory, Jambyl oblysynyń Qurmetti azamaty Sáýle Meshitbaıqyzy sóz alyp, is-sharanyń mańyzdylyǵyna toqtaldy. Sondaı-aq, qazaqtyń ulttyq sýsyny qymyzdyń qadir-qasıeti jaıly oıyn ortaǵa saldy.
Jınalǵandar ǵasyrlardan ǵasyrlarǵa jalǵasyp kele jatqan ulttyq qundylyqtardy qurmettep, dástúrdi dáriptegen eldiń alǵa ozatynyn atap ótti. Sondaı-aq qasıetti sýsyn qymyzdy ulttyq brendke aınaldyrý, ony keń kólemde nasıhattaý, ol úshin elimizde «Qymyzmuryndyq» dástúrin atap ótýdi jalpyhalyqtyq sıpatqa aınaldyrý sekildi usynys-pikirlerin ortaǵa saldy.
Jambyl oblysy