Ekologııa, geologııa jáne tabıǵı resýrstar mınıstrligine qarasty Geologııa komıtetiniń tóraǵasy Talǵat Satıev málimdegendeı, Reseı jáne Qytaımen shekaralas alańdarda jańa qorǵasyn-myrysh ken oryndary ashylýy múmkin, dep habarlaıdy Egemen.kz.
«Qazaqstanda jańa ken oryndaryn ashý úshin aıtarlyqtaı perspektıvalar bar. Aqmola jáne Qostanaı oblystarynyń, ortalyq, shyǵys jáne ońtústik óńirlerdiń alańdarynda altynnyń ken oryndary bar. Ortalyq jáne Ońtústik Qazaqstanda, Kendi Altaıda, sondaı-aq Reseı jáne Qytaımen shekaralas alańdarda jańa qorǵasyn-myrysh ken oryndary ashylýy múmkin», dedi komıtet tóraǵasy Ortalyq kommýnıkasııalar qyzmetinde ótken brıfıngte.
Onyń aıtýynsha, elimizde volfram, molıbden, alıýmınıı, qalaıy sııaqty sırek kezdesetin paıdaly qazbalardyń jańa ken oryndaryn ashý perspektıvalary jeterlik.
«Memleket basshysynyń tapsyrmasyna sáıkes, 2021-2025 jyldarǵa arnalǵan «Geologııa salasyn damytý» baǵytyn qamtıtyn «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy qabyldandy. Onyń aıasynda zertteýlerdiń jalpy aýdany 2026 jylǵa qaraı 680 myń sharshy shaqyrymnan asady», dedi Talǵat Satıev.