Qostanaı aýdanyndaǵy «Arǵymaq» ıppodromynda ulttyq at sporty jarystarynyń jańa maýsymy ashyldy. Bıyl ult ustazy Ahmet Baıtursynulynyń 150 jyldyǵy men Balalar jylyna arnalyp otyrǵan aıtýly sporttyq is-sharada qazaqtyń ejelden kele jatqan qyz qýý, aýdaryspaq, kókpar oıyndary ótti. Al dúıim jankúıer jurttyń delebesin qozdyrǵan alaman, qunan jarystarda elimizdiń soltústik jáne batys óńirlerinen kelgen sáıgúlikter báıgege tústi.
Jańa maýsymnyń ashylý rásimine jınalǵan sportsúıer kópshilikti oblys ákiminiń birinshi orynbasary Ǵaýez Nurmuhambetov pen Qazaqstan Respýblıkasy Ulttyq at sporty túrleri qaýymdastyǵynyń atqarýshy dırektory Rahat Jaqsybaı quttyqtap, atalmysh sharanyń basty maqsaty Qostanaı jylqysyn nasıhattaý ekenin, búginde osy tuqymdy kóbeıtý joldary qarastyrylyp jatqanyn aıtty.
Uıymdastyrýshylardyń sózinshe, Qostanaıda 1889 jyly qazaq qazanatynyń negizinde jylqy zaýyty ashylyp, alpys jylǵa jalǵasqan úzdiksiz kúrdeli býdandastyrý jumystary júrgizilgen kórinedi. Nátıjesinde, alynǵan Qostanaı qazanaty 1951 jyly resmı túrde jeke tuqym retinde tirkelipti. Bitimi dala jylqysyna tán shymyr, súıegi iri, bulshyq etteri jaqsy damyǵan, aıaǵy sińirli, bolat tuıaqty bolyp keletin asyl tuqymdy bul tulpardyń sany 1969 jylǵy sanaq boıynsha 44 myńǵa jetkenimen, qazir múlde azaıyp ketken.
Sondyqtan bul jolǵy báıgede Qostanaı qazanatyna aıryqsha mán berilip, tek osy tuqymǵa arnalǵan 1 000, 1 800 metrlik ushqyr jarys, 5 shaqyrymdyq qunan báıge jáne 18 shaqyrymdyq alaman uıymdastyryldy. Munyń syrtynda, aralas tuqymdy sáıgúlikterdiń 4 shaqyrymdyq qunan jarysy men 16 shaqyrymdyq alaman báıgesi ótti.
Aralas tuqymdy jáne taza Qostanaı qazanattary arasynda ótken alamandarda Aqmola oblysynyń sáıgúlikteri top jardy. Aralas tuqymdy jýan attardyń 16 shaqyrymdyq báıgesinde shashasyna shań juqtyrmaǵan Toıdýman atty dúldúl birinshi oryn aldy. Al Qostanaı tuqymdy jýan attar arasynda ótken 18 shaqyrymdyq báıgede Aqmola oblysynan kelgen atbegi Ádilet Tasmaǵambetovtiń Zanzıbara atty tulpary máre syzyǵyn birinshi bolyp kesip ótip, alamannyń bas júldesi jeńil avtokólikke qosa, 900 myń teńgeni olja etti.
Qazaqtyń ulttyq óneri aýdaryspaqta Rústem Júginisovke eshkim shaq kelmedi. Al kókpar tartysynda Tobyl qalasynyń oıynshylary jeńiske jetti. Sharany uıymdastyrýshylardyń aıtýynsha, bıyl óńirde Qostanaı tuqymdy arǵymaqtar men Qostanaı býdandaryna ǵana arnalǵan 22 báıge ótkizý josparlanyp otyr.
Qostanaı oblysy