Ertis-Baıan óńiriniń jurtshylyǵy ala tańnan daýys berýge aǵyldy. Oblystyq aýmaqtyq referendým komıssııasynyń málimetinshe, aımaqta bul kúni 520 referendým komıssııasy jumys istegen.
Referendým ýchaskeleriniń árqaısysy qajetti quraldarmen, ár azamat óz qalaýy boıynsha jańa Konstıtýsııa jobasymen tanysa alatyn aqparattyq stendtermen jabdyqtaldy.
«О́ńirde shamamen 500 myńdaı adam daýys berý quqyǵyna ıe. Tizimde 26 myńǵa jýyq múmkindigi shekteýli jan tirkelgen bolsa, olardyń ishinde 3 200 adamǵa erekshe jaǵdaı qajet. Arbaǵa tańylǵandar – №305, kórý qabileti nashar daýys berýshiler – №365, al estý qabileti nashar daýys berýshiler №293 ýchaskede daýys bere alady. Ýchaskelerdiń basym bóligi pandýspen jabdyqtalyp, arnaıy baǵyttaǵyshtar ornatylǵan. Sondaı-aq kórý qabileti buzylǵan saılaýshylardyń daýys berýge óz betinshe qatysýyna múmkindik beretin Braıl shrıftimen jazylǵan 520 bıýlleten trafareti daıyn tur. Turǵyndar tańerteńnen belsendilik tanytyp jatyr», dep atap ótti oblystyq aýmaqtyq referendým komıssııasynyń tóraǵasy Gúlnar Amanjolova.
Qazaqstannyń Eńbek Eri, «Táýelsiz Qazaqstannyń Halyq Batyrlary» qoǵamdyq birlestigi oblystyq fılıalynyń tóraǵasy Ryshat Ámirenov Ekibastuz qalasyndaǵy №373 ýchaskege alǵashqylardyń biri bolyp keldi.
«Kómir ónerkásibinde 38 jyl eńbek ettim. Adal eńbek mańyzdy. Ata zańymyz negizinde adam jáne adamı qundylyqtar, bılik tarmaqtarynyń teńgerimi, zań ústemdigi men áleýmettik ádilettilik qaǵıdattary jatyr. Biz orta jastan asyp, aqsaqaldyq jasqa jetip qaldyq. Qoǵamnyń endigi kilti – balalarymyzda. Al Konstıtýsııa olarǵa qyzmet etýi kerek. Sondyqtan búgin óz tańdaýymdy jasaýǵa keldim», deıdi ol.
Ryshat Babaıulynyń ul-qyzdary da kómir ónerkásibinde qyzmet etip júr. Olardyń arasynda mehanık, burǵylaýshy, marksheıder, elektrık mamandary bar. Áýlettiń saladaǵy jalpy eńbek ótili 270 jyldan asyp otyr.
Al tańdaýlaryn jasaǵan egiz arý Aıman men Sholpan Amangeldıevalardyń jasy 20-da. Qos arý О́zbekstanda dúnıege kelip, 2018 jyly otbasymen Qazaqstanǵa qonys aýdarǵan. №529 referendým ýchaskesinde daýys bergen egizder qoldaryndaǵy bıýlletenderin «elimizdiń erteńi baıandy bolsyn» degen tilekpen jáshikke saldy.
Atap óterligi, densaýlyǵyna baılanysty úıden daýys berýdi qalaǵandar bul kúni 12.00-ge deıin tıisti referendým ýchaskesine habarlasyp, ótinish qaldyra aldy. Qaladaǵy qoǵamdyq kólikter jolaýshylardy tegin tasymaldady. Sondaı-aq ınvataksıler tegin qyzmet kórsetti.
Pavlodar oblysy