Mádenıet jáne aqparat mınıstri Aıda Balaeva «Halyq áýeni» respýblıkalyq óner kerýeniniń qorytyndylanǵanyn málimdedi. Bul týraly ol Facebook-tegi paraqshasynda jazdy, dep habarlaıdy Egemen.kz.
Mınıstrdiń aıtýynsha, úsh kún boıy ótken aýqymdy mádenı joba eldiń birneshe óńirin qamtyp, ulttyq ónerdi nasıhattaýǵa baǵyttaldy. О́ner kerýeni Abaı, Aqmola, Aqtóbe, Almaty, Atyraý, Batys Qazaqstan, Jetisý, Jambyl, Qaraǵandy, Mańǵystaý, Qostanaı, Qyzylorda, Soltústik Qazaqstan, Ulytaý, Túrkistan, Shyǵys Qazaqstan jáne Pavlodar oblystaryn aralap, 51 aýdan men eldi mekende konsert uıymdastyrǵan.
Úsh kún ishinde konserttik baǵdarlamalardy 20 myńnan astam kórermen tamashalaǵan. Ásirese shalǵaı aýyldar men aýdan ortalyqtarynyń turǵyndary óner ujymdaryn erekshe yqylaspen qarsy alyp, ulttyq mádenıetke degen qurmetin kórsetken.
Sońǵy úsh jylda mádenıet salasynyń 592 ókili memlekettik nagradalarmen marapattaldy
Jobaǵa elimizdiń jetekshi shyǵarmashylyq ujymdary qatysty. Atap aıtqanda, Qurmanǵazy atyndaǵy Qazaq ulttyq halyq aspaptar orkestri, «Saltanat» memlekettik bı ansambli, «Qazaqstan kameratasy» memlekettik klassıkalyq mýzyka ansambli, Abaı atyndaǵy Qazaq ulttyq opera jáne balet teatrynyń solısteri, N.Tilendıev atyndaǵy «Otyrar sazy» orkestri, Memlekettik úrmeli aspaptar orkestri, B.Baıqadamov atyndaǵy memlekettik hor kapellasy jáne ózge de óner ujymdary kórermenge joǵary deńgeıdegi konserttik baǵdarlamalar usyndy.
Lısakov qalasynda Qurmanǵazy orkestriniń «Halyq áýeni» konserti ótti
Kerýen aıasynda dástúrli án, halyq mýzykasy, sımfonııalyq shyǵarmalar, mıýzıkl janryndaǵy qoıylymdar, estradalyq baǵdarlamalar men horeografııalyq kompozısııalar sahnalanǵan. Mınıstr bul bastamanyń mádenıet pen ónerdiń qoǵamdaǵy rýhanı baılanysty nyǵaıtatyn mańyzdy kúsh ekenin taǵy bir márte dáleldegenin atap ótti.
Sondaı-aq Aıda Balaeva jobaǵa qoldaý kórsetken Halyk Bank pen basqarma tóraǵasy Úmit Shaıahmetovaǵa alǵys bildirdi.
«Ulttyq mádenıet pen rýhanııatty qoldaýǵa baǵyttalǵan mundaı iri jobalar – eldiń mádenı damýyna qosylǵan mańyzdy úles. Halyq pen óner arasyndaǵy altyn kópirge aınalǵandaryńyz úshin zor rızashylyǵymdy bildiremin», dedi mınıstr.
Mınıstr sondaı-aq jobaǵa qatysqan shyǵarmashylyq ujymdarǵa, mádenıet salasynyń qyzmetkerlerine, óńir ákimdikterine jáne ónersúıer qaýymǵa alǵys aıtty. Onyń sózinshe, aldaǵy ýaqytta mundaı bastamalarǵa ózge de bankter men demeýshiler qoldaý kórsetedi degen senim bar.
Aıta keteıik, Almatyda mádenıet qyzmetkerlerine 60 páterdiń kilti tabystaldy.