Majarstannyń jańa Premer-mınıstri Peter Madıar memlekettik sektordaǵy shyǵyndardy qysqartý týraly málimdeme jasady. RTL Hungary telearnasyna bergen suhbatynda ol óz jalaqysyn eki esege deıin qysqartatynyn aıtty, dep habarlaıdy Egemen.kz.
Mınıstrler kabınetiniń jetekshisi óz sózinde burynǵy Premer-mınıstr Vıktor Orban alyp kelgen úlken kólemdegi tólemderden bas tartyp, budan bylaı tek premerlik jalaqy men depýtattyq mazmundaǵy tólemaqyny ǵana alýdy josparlap otyrǵanyn jetkizdi. Nátıjesinde onyń jalpy tabysy aıyna shamamen 3,8 mln forınt brýttony nemese 10,5 myń eýrony (shamamen 5,7 mln teńge) quraıtyn bolady.
Jalaqyny qysqartý mınıstrlerge, memlekettik hatshylarǵa, depýtattarǵa, ákimderge jáne memlekettik kompanııa basshylaryna da qatysty bolmaq. Premer-mınıstrdiń aıtýynsha, qıyn kezeńde saıasatkerler «tabys tabýdy emes, halyqqa qyzmet etýdi» oılaýy kerek.
Sonymen qatar úkimet depýtattarǵa beriletin ótemaqylardy da azaıtýdy kózdep otyr. Buǵan deıin parlament músheleri kólik, turǵyn úı jáne qyzmetkerler eńbekaqysyna aıyna 7 mln forıntke deıin ótemaqy ala alatyn. Endi bul lımıt 5 mln forıntten tómen deńgeıge deıin qysqarýy múmkin.
«Jalaqyda aıyrmashylyq bar»: Temir qalasynyń turǵyndary aýyl mártebesin berýdi surap otyr
Peter Madıardyń sózinshe, atalǵan ózgerister memlekettik bıýdjetten shamamen 50 mlrd forınt nemese 139 mln eýro kóleminde qarjy únemdeıdi.
Qazirgi tańda Majarstandaǵy ortasha jalaqy aıyna shamamen 640 myń forınt brýttony (900 myń teńgege jýyq) quraıdy. Osyǵan baılanysty joǵary laýazymdy sheneýnikterdiń tabysy eldegi ortasha eńbekaqydan áldeqaıda joǵary bolǵan.
Eske sala keteıik, buǵan deıin Májilis depýtaty Baqytjan Bazarbek aı saıyn alatyn 900 myń teńge kólemindegi jalaqysy otbasylyq shyǵyndy tolyq óteýge jetpeıtinin aıtqan bolatyn.