Astanada 2026 jylǵy Qurban aıt merekesi kezinde qurbandyq shalýǵa arnalǵan arnaıy oryndar belgilendi. Bıyl mereke 27-29 mamyr aralyǵynda ótedi. Al aıt namazy 27 mamyr kúni tańǵy saǵat 06:00-de elordadaǵy barlyq meshitte oqylady, dep habarlaıdy Egemen.kz.
Qurbandyq shalý kún saıyn saǵat 07:00-den 18:00-ge deıin tek arnaıy bekitilgen bes orynda ǵana júrgiziledi.
Baıqońyr aýdanynda tórt oryn anyqtaldy:
«Shanhaı» bazary; «Barakat» bazary; «Jaılaý» bazary; «Shaýshen» sharýa qojalyǵy.Al Almaty aýdanynda bir oryn belgilengen:
«Et-Han» et sehy.Qala ákimdigi maldy arnaıy oryndardan tys jerde soıýǵa qatań tyıym salynatynyn eskertti. Sondaı-aq qurbandyq qaldyqtaryn qarapaıym qoqys jáshikterine tastaýǵa bolmaıdy. Mamandar etti tek sertıfıkattalǵan satýshylardan satyp alýǵa jáne sanıtarlyq talaptardy saqtaýǵa keńes beredi.
Qurban aıt – musylmandardyń qasıetti merekeleriniń biri. Ol qajylyq maýsymynyń aıaqtalýyn bildiredi jáne úsh kún boıy atalyp ótedi. Dinı talaptarǵa sáıkes qurbandyqqa bir jastan asqan qoı men eshki, eki jastan asqan sıyr jáne bes jastan asqan túıe shalýǵa bolady.
Qurbandyq eti dástúr boıynsha úsh bólikke bólinedi: bir bóligi otbasyǵa qalady, ekinshisi týystar men kórshilerge beriledi, al úshinshi bóligi muqtaj jandarǵa taratylady.