Elordada sóıleý jáne psıhıkalyq damýy tejelgen mektep oqýshysyn qatarlastary uryp-soqqan. Bul týraly onyń anasy áleýmettik jelide málimdedi, dep habarlaıdy Egemen.kz.
Áıeldiń aıtýynsha, oqıǵa sabaqtan keıin bolǵan. Onyń ulyn mektepten shyqqan kezde segiz oqýshy kútip turǵan. Solardyń biri jasóspirimge artynan shabýyl jasap, tunshyqtyryp, soqqyǵa jyqqan.
«Meniń balama 15-ten astam soqqy baǵyttalǵan. Bul ýaqytta balalar janynda turyp, ózgelerdiń arasha túsýine múmkindik bermeı ustap turǵan. Balamnyń damýynda erekshelik bar. Ol qasyndaǵylardyń ne úshin bulaı jasaǵandaryn da tolyq túsine almaǵan. Al aınalasyndaǵy balalar kúlip qarap, telefonǵa túsirip turǵan» dep jazdy áleýmettik jeli paraqshasynda zardap shegýshiniń anasy.
Mekteptegi qysym: Balalar arasyndaǵy býllıngtiń zardaby qandaı?
Oqıǵaǵa qatysty Astana qalasynyń Polısııa departamenti túsinikteme berdi. Vedomstvo málimetinshe, janjalǵa qatysqan barlyq jasóspirim anyqtalyp, polısııa bólimshesine jetkizilgen.
«Olar profılaktıkalyq esepke qoıyldy. Kámeletke tolmaǵandardy tárbıeleý mindetin oryndamaǵany úshin olardyń zańdy ókilderi ákimshilik jaýapkershilikke tartyldy. Sonymen qatar mektep ákimshiligi men zańdy ókilderdiń qatysýymen quqyqbuzýshylyqtyń aldyn alý jónindegi keńes ótkizildi», delingen habarlamada.
Eske sala keteıik, buǵan deıin Qyzylorda qalasyndaǵy «Bolashaq» medısınalyq kolledji jataqhanasynda býllıngten birinshi kýrs stýdenti qaza tapqan edi.