Búgin elimizdiń barlyq mektepterinde sońǵy qońyraý soǵylyp, 2025-2026 oqý jyly aıaqtaldy. Bıyl oqý jylyn 3,9 mıllıonnan astam oqýshy aıaqtasa, onyń ishinde 215 myńnan astamy – 11-synyp túlekteri, dep habarlaıdy Egemen.kz.
Oqý-aǵartý mınıstrliginiń málimetinshe, bıyl 31 myńnan astam oqýshy – 9-synypty úzdik aıaqtaıtyndar qatarynda. Al 11-synypty úzdik aıaqtaýǵa – 18 myń oqýshy úmitker. Búginde elimizdiń bilim berý uıymdarynda 420 myńnan astam pedagog eńbek etip keledi.
Al Prezıdent tapsyrmasymen qoldanysqa berilgen «Keleshek mektepterinde» 220 myńnan astam oqýshy bilim alyp, 16 myńǵa jýyq pedagog jumys isteıdi. Ulttyq jobasy aıasynda bıyl 217 zamanaýı mektep paıdalanýǵa berilgen. Onyń 84-i aýyldyq eldi mekenderde ornalasqan.
Astana mektepterindegi oryn tapshylyǵy máselesi qalaı sheshilmek?
Bıyl mektep bitirý saltanattaryn ótkizý tártibine qatysty talaptar kúsheıtildi. Oqý-aǵartý mınıstrligi men jergilikti atqarýshy organdardyń birlesken sheshimine sáıkes, túlekterge arnalǵan keshterdi meıramhana, dámhana, banket zaly, demalys orny nemese tabıǵat aıasynda uıymdastyrýǵa tyıym salyndy.
Mınıstrliktiń málimetinshe, attestat pen dıplom tabystaý rásimderi tek bilim berý uıymdarynyń qabyrǵasynda ótkizilýi tıis. Sondaı-aq ata-analardan aqsha jınaýǵa, muǵalimderge syılyq jasaýǵa nemese ózge de materıaldyq shyǵyndardy talap etýge jol berilmeıdi. Onyń orynyna 25 mamyr kúni elimizdiń barlyq mektepterinde «Bilimim – Otanyma!» taqyrybynda biryńǵaı synyp saǵaty ótkiziledi.
«Dańǵoılyq jármeńkesine aınaldy»: Depýtat mektep bitirý keshterine qyrýar qarjy jınaý týraly
Sonymen qatar bitirýshi túlekterge arnalǵan emtıhan merzimderi belgili boldy. 9-synyp oqýshylary úshin qorytyndy emtıhandar 29 mamyr – 11 maýsym aralyǵynda ótedi. Olar mindetti pánder boıynsha tórt jazbasha emtıhan tapsyrady.
Al 11-synyp túlekterine arnalǵan memlekettik emtıhandar 2 maýsym – 15 maýsym aralyǵynda ótedi. Oqýshylar bes emtıhan tapsyrady, onyń biri aýyzsha formatta ótkiziledi. Negizgi jáne jalpy orta bilim týraly attestattar 17-18 maýsym aralyǵynda tapsyrylady.