«Balalar jyly» aıasyndaǵy is-sharalarǵa 48,3 mlrd teńge bólingen, dep habarlaıdy Egemen.kz. Bul týraly búgin óziniń Facebook paraqshasynda QR Premer-Mınıstri Álıhan Smaıylov jazdy.
Úkimet basshysynyń aıtýynsha, balalar merekesine sáıkes kelgen búgingi Úkimet otyrysynda Memleket basshysynyń Jarlyǵymen jarııalanǵan «Balalar jylyn» ótkizý máselesi talqylanǵan.
«Bıyl «Balalar jyly» aıasynda kóptegen is-sharalar josparlanyp, júzege asyrylýda. Bul maqsatqa memlekettik qazynadan jalpy somasy 48,3 mlrd teńge bólindi. Olardyń barlyǵy naqty oryndalýy tıis. Eń bastysy – balalarymyzdyń qaýipsizdigin qamtamasyz etý», dep jazdy Premer-Mınıstr.
Sondaı-aq ol oblys ákimdikterine áleýmettik jaǵynan az qamtylǵan otbasylardyń balalaryn saýyqtyrý sharalarymen qamtýdy, olardyń jazǵy demalysta bos ýaqytyn paıdaly ótkizý máselesine kóńil bólýdi tapsyrǵanyn da atap ótti.
Premer-Mınıstrdiń aıtýynsha, aýyldyq jerlerde sport alańdary men balalardy damytý ortalyqtary jabdyqtalýy tıis.
«Densaýlyq saqtaý mınıstrligi shalǵaı eldi-mekenderdegi balalardyń densaýlyq jaǵdaıyna skrınıngtik jáne stomatologııalyq tekserýler júrgizý úshin jyljymaly medısınalyq pýnktterdiń jumysyn uıymdastyratyn bolady», dedi Úkimet basshysy.
Sonymen qatar balalardyń quqyǵyn saqtaýǵa, ekskýrsııalyq-tanymdyq is-sharalar uıymdastyrýǵa, olardy túrli úıirmelermen jáne seksııalarmen qamtýǵa qatysty birqatar tapsyrmalar berdi.
Alıhan Smaılovtyń jazbasynda barlyq óńir ákimderi «Balalar jylyna» arnalǵan is-sharalardyń oryndalýyn jeke baqylaýynda ustaýy tıistigi de aıtylǵan.
«Adamnyń bir qyzyǵy – bala degen» dep aqynymyz Abaı aıtqandaı, balalardyń bilim alyp, olarǵa jan-jaqty qamqorlyq jasaý, quqyqtaryn qorǵaý – memlekettiń mańyzdy mindeti. Sondyqtan keshendi is-sharalardyń barlyǵy meniń turaqty baqylaýymda bolady», dedi Álıhan Smaıylov.
Aıana Toǵanbek