Búgin Qazaqstan Respýblıkasynyń Memlekettik rámizderiniń 30 jyldyǵyn merekeleýge arnalǵan biryńǵaı respýblıkalyq aksııa aıasynda Indýstrııa jáne ınfraqurylymdyq damý mınıstrliginiń 150 qyzmetkeri Qazaqstan Respýblıkasynyń Ánuranyn oryndap, merekelik kórsetilim uıymdastyrdy dep habarlaıdy Egemen.kz QR IIDM baspasóz qyzmetine silteme jasap.
Shara barysynda mınıstrlik ǵımaratynda Memlekettik rámizderdiń 30 jyldyǵyna oraı resmı rámizder beınelengen merekelik banner kóterilip, tý ilindi. QR IIDM Apparat basshysy Erbolat Muqaev quttyqtaýyn aıtty.
«Sizderdi elimizdiń memlekettik rámizderiniń 30 jyldyǵymen shyn júrekten quttyqtaımyn. Olar memlekettiń kózge kórinbeıtin negizderiniń biri, al memlekettik rámizderge zor jáne qurmetpen qaraý – memleket damýynyń quramdas bóligi. Osy ataýly kúni barlyǵyńyzǵa densaýlyq, tabys, elimizge amandyq tileımin», dedi E.Muqaev.
Shara patrıottyq fleshmobpen jalǵasty. Bólim qyzmetkerleri ólshemi 8×4 metr bolatyn úlken jalaýdy jaıyp, sonymen qatar 30 sımvoldyq sanyn beıneledi. Basty maqsat – jastardyń patrıotızmin nyǵaıtý, Qazaqstannyń qundylyqtary men jetistikterin nasıhattaý.
Eske sala keteıik, osydan týra 30 jyl buryn, 1992 jyly 4 maýsymda Táýelsiz Qazaqstannyń memlekettik rámizderi bekitilgen bolatyn. Bul kún jańa memlekettik rámizderimiz – Týdyń, Eltańbanyń jáne Ánurannyń týǵan kúni retinde tarıhta máńgi qalady. Respýblıkamyzda Memlekettik rámizder kúni Qazaqstan Respýblıkasy Tuńǵysh Prezıdentiniń 1998 jylǵy 20 qańtardaǵy «Qazaqstan Respýblıkasyndaǵy kásiptik jáne ózge de merekeler týraly» jáne 2007 jylǵy 4 maýsymdaǵy «Jarlyqqa ózgeris engizý týraly» Jarlyǵyna sáıkes atalyp ótiledi.